Июньдалул 18-нний «Дагестан» РИА-лий хьунни бувчIавурттах гузла баврил (по наблюдению за выборами) региондалул жяматийсса штабрал каялувчи Динислам Дадаевлул ва штабрал экспертътурал комиссиялул бакIчи Эдуард Уразаевлул пресс-конференция.
Спикертурал бусаврийну, сентябрьданул 20-нний дайдихьлай дур Цасса бувчIавурттал кьини. Га кьини бувчIинтIий бур ПаччахIлугърал Думалувунсса ва Халкьуннал Мажлисравунсса тепутатътал, мукунна хьунтIий дур муниципал даражалул бувчIавурттугу.
БувчIавуртту хьунтIий дур шанна кьинилул мутталий–сентябрьданул 18, 19 ва 20-нний. ЦIанасса ппурттуву хIадур хъанай байбивхьуну бур бувчIавурттайн.
БувчIавурттайн хIадур шаврил лагрулий жяматийсса штабрал агьаммур давуну хъанай дур бувчIавурттал компаниярттал системалийнусса мониторинг дуллалаву, гузлачитуран даву дачин дуван лахьхьин баву, бувчIавурттал иширттая агьалинахь бусласаву. Сакин дурну дур гузлачитал бувчIавурттайн хIадур баврил даву, хIадур бантIий бур 4300 жяматийсса гузлачи. Штабрал даву цIудуккан даву, мукунна Др-лул Жяматийсса палаталулгу, жяматийсса ккуранналгу, коммерциялул дакъасса сакиншиннардалгу, политикийсса партиярттал региондалийсса отделенияртталгу дянив уртакьну зузаврил хIакъиравусса кьутIи чичавугу хъанахъиссар граждан общество цачIун даврил чулухунмайсса хъунмасса ша.
ЧIурду булаврил кьинирдай контрольданул ца агьамсса бутIану хъанай бур Жяматийсса гузлалул центр (ЦОН), ва дузал бантIий бур Ростелекомрал площадкалий. Центрданул щаллу дувантIиссар гьантлул мутталийсса чIурду булаву нанаврил ва участокирттал даврил видеомониторинг, центрданул зузалт анаварсса мутталий хIала буххантIиссар диялдакъашивуртту, къалмакъаллу хъанахъисса иширттавух.
Мукунна штабрал бувчIавурттал участокирттай сакин буллай бур экспертътурал группа. Ванил давривун бувцуну бур юристътал, политологтал,ва социологтал, вайннал дуллантIиссар бувчIавурттал процедурарттал правалул анализ, ххал дуллантIиссар агитациялул законну лиян даврил хIалкьазия, мукунна хIадур дуллантIиссар оператив аналитикалул справкартту ва рекомендацияртту.
ХI.Аьдилов
