Ларгсса нюжмаркьини Ма­хIач­къалалив, Расул ХIамзатовлул цIанийсса Миллатрал библиотекалуву, хьунни Лакрал райондалул бакIчи Зураб Куччаевлул райондалия бувксса ишбажаранчитуращалсса хьунабакьаву.

Ваний гьуртту хьунни ттуршлий мукьцIалаксса инсан: ишбажаранчитал, райондалул шяраваллал бакIчитал, идарарттал каялувчитал, жяматийсса ишкка­ккулт. Бусравсса хъамаллуравух бия ацIния мяйра шин Лакрал райондалул бакIчинал къуллугърай дурсса Юсуп МахIаммадов, ДР-лул Жяматийсса Палаталул хъунаманал хъиривчу Ссапарбаг Аьбдуллаев, Аьрасатнал Виричу НурмахIаммад ХIажимахIаммадовлул нину Сапижат Мазаева, М. Илиясовал цIанийсса «Дараччи» фондрал каялувчи Гульшан Хасаева, Аьра­сатнал шагьрурдая бувкIсса ишбажаранчитал.


«Жула ватан цар, жула мархри цар. Жухьра дакъассар цукунчIавсса ихтияр жула Ватан хъамаритансса», – увкунни
Зураб Куччаевлул. 


Зураб Куччаевлул гьарза-гьартану бувсунни райондалул бакIчину зун айивхьуния шинай хIакьинунин арулва зурул мутт­а­лий дан бювхъусса давурттая. КIицI лавгунни цалчина-цалчин кIул хьушиву райондалийсса тагьарданущал, гьарца шяраваллил жяматращал хьунаавкьуну, кIул хьушиву агьалинал буруккинттащал. Ххал бувшиву идарарттал хIалкьазия. Барчаллагь увкунни Юсуп МахIаммадовлухь цала лув цIакьсса гьану кьабитаврихлу, райондалий инфраструктура хьхьичIунсса ххуттай ккалли дансса душивугу кIицI лавгун.
Амма ва батIаврил агьаммур мурад бия цамур – Лакку билаят хьхьичIунмай баврил ххуллий ватанлувтурахь цачIунмай хьияра тIисса.

Оьвчаву дурунни ватанлувтурайн буттал улча хьхьичIунмай баврил ххуллийсса иширттаву гьурттушинна дуллан, цала идарартту райондалий сияхIрайн ласун, налогирттая дучIаймур Лакку билаятран лябуккулул ххуллий ишла дуллан бюхъаншиврул.
«Жула ватан цар, жула мархри цар. Жухьра дакъассар цукунчIавсса ихтияр жула Ватан хъамаритансса, – увкунни Зураб Куччаевлул.

Изображение

Ялун ххигу бунни: «На оьвтIий ура гьарцаннайн: хъамаритияра куннал куннайнсса къаччанбикIавуртту – зула дянивсса хьуннав, политикалул хIуччалул ялувсса хьуннав, цукунсса духьурчагу. Миннул жува махъунмай буллалиссару. Жула мурад цар – жула райондалул ялун бучIантIимур. Ттул умуд бур жущава бюхъантIишиврийн жула ватанлувтал райондалийн кIункIу бан. Жува ца кулпатру. ЦачIу буссаксса, жущава бюхъантIиссар яла жапану чIалачIисса мурадругума дузрайн буккан бан».
Райондалул бакIчинал кIицI лавгунни яла агьамсса ххуллурду: туризм – экономика хьхьичIуннай дансса ва зузи кIанттурду хIасул бансса ххуллу хIисаврай.
Предприятияртту райондалий сияхIрайн ласаву – налогру кIанттул бюджетраву личIаншиврул ва ми агьалинан лябукку буну ишла дуллан бюхъаншиврул.

Муния махъ ДР-лул Жяматийсса палаталул хъунаманал хъиривчу Ссапарбаг Аьбдуллаевлул хъин чулий ккавккунни Зураб Куччаевлул ишбажаранчитал райондалийн кIункIу бансса пикри ва муницIун бавхIусса мурадру.
Юсуп МахIаммадовлул ацI­ния мяйра шинал манзилданийсса цала даврил опыт хIисав бувну, кIицI лавгунни иш бавчусса ватанлувтурал ка-кумаг бакъа хьхьичIунмай хъит чин къабюхъантIишиву. КIицI ларгунни миннал чIарахбацIулийну чулийн дурксса проектру. Сапижат Мазаевал бувсунни, Аьра­сатнал ПаччахIлугърал Думалул депутатшиврийнсса кандидат хIисаврай, Лакку билаят хьхьичIунмай баврил ва ватанлувтурал ахIвал лавай баврил ххуллий цила хьхьичI бихьлахьисса мурадру.
Цала-цала пикрирду кIи­бавчIунни райондалул азарханалул хъунама хIакин АьбдурахIин Дибировлул, ИхIсандалул фондирттал ассоциациялул каялувчи Тимур ХIажижираевлул, «Дараччи» фондрал каялувчи Гульшан Хасаевал, Ханты-Мансийскаллал округрай ялапар хъанахъисса ЧIаратусса Эльмира Ибрагьимовал ва цайминнал.
Хьунабакьаву къуртал хьу­нни Лакрал райондалия бувксса ишбажаранчитал буттал кIану хьхьичIунмай баврил ххуллий инвестицион проектирттаву чялишсса гьурттушинна дуллан рязину бушиврийнсса хьул-умуд ххи буллалисса ихтилатирттайну.
Зулайхат Тахакьаева