ЦIакь хьусса ххаллилсса аьдатрайн бувну, махъсса цимирагу шинал дянив Лакрал райондалий Шушиннал шяравалу диркIсса кIанайн майрал 9-мур кьини бучIайссар ЦIуссалакрал райондалийсса Шушиннал шяраваллил вакилтал, буттахъалгу, ттаттахъалгу рухIирдал хIурматран, дяъвилул ва захIматрал фронтирттай бивкIминнал ва гужирай зунттава бизан бувминнал аьпалун дацIан дурсса гьайкалданучIан, цала буттахъал гьаттардил кIалазурттацI бацIан.

Ва ххуллухь, Бюхттулсса Ххувшаврил 80 шинан хасну, Шушиятусса Юнус Джалиевлул, ванал арснал ХIажи Джалиевлул, Ибрагьим Буттаевлул ва Саэд Оьмаровлул цIу дуккан дунни ларай кIицI ларгсса гьайкал. Ванил лагма-ялттусса кIану мурхьру бугьанну гьарта-гьарза бунни, гьайкал цурдагу 1 метра ва 20 см лахъ дунни. ЦIанасса интту гьайкалданул лагма бувгьунни цаппара­сса мурхьру, ялуннин бугьансса кIанугу ливчIунни.
Шиккува дакIнин бутан, Юнус революционер Адам Джалиевлул арснал арсри. Юнуслул ппу ХIажи фронтовик ивкIссар.
ЦIу дуккан дурсса гьайкалданучIа хьунни батIаву. Ваний гьуртту хьунни шушиннал чIарав мудангу бусса чIаххуврайсса КIундиннал шяраваллил чиваркIгу. БавтIми дакIру тIиртIуну кьамул бунни Шушиннал шяравалу диркIсса кIанай дирхьусса КIундиннал фермалий зузисса Жабир ва Аьйшат Ясулбуттаевхъал.
Хьунни лавгмур, буттахъал, буттал буттахъал дурсса виричувшивуртту, бивхьусса захIмат дакIнин бичлачисса ихтилатру. Цала мархри хъамакъабивтун, буттахъал миналийн бучIайсса шушиннахь барчаллагь тIутIисса ихтилат бунни КIундиятусса МахIаммад ХIасановлул. Ванал кIицI лавгунни га дяъви Шушиннал щарнин кIилийну захIмат хьушиву: цалчин, шяраву бур учинсса чиваркI дяъвилийн лавгун, кIилчингу, мина-гьанугу, захIматсса зунттал кIанаву зий-занай щаллу дурмургу кьадиртун, чил кIанттурдайн бачин­сса буккаву. ЧIа увкунни шушиннангу, лакрал щалва ми­ллатрангу ххари-хъиншивуртту ялун дияву.
Юнус Джалиевлул, бавтI­миннахь Ххувшаврил байрангу барча куну, барчаллагь увкунни гьарца шинах цалва чIарав бацIан шиккун букIлакIисса, уссур-ссуннал ххуллийсса КIундиннал жяматрахь.
Буттал КIанттул цIанийсса Хъунмасса дяъви байбивхьусса чIумал, зунттавусса Шушиннал шяраву 42 хозяйство диркIун дур. Шичча душманнащал талан лавгун ур 29 адамина. Цаймигу жула щархъавух 1944-ку шинал Шушинналмур шяравалугу дизан дурну диркIссар кьанив. Шяравалу диркIсса кIанай (шикку яхьуну бур анжагъ чар­тту) 2010-ку шинал Юнус Джалиев бакIчину Новостройрай ялапар хъанахъисса шушиннал дацIан дурссар Хъун дяъвилийн лавгминнал, фронтран кумагран къинттуллух зий бивкIминнал ва шярава гужирай бизан бувминнал аьпалунсса гьайкал. Гания шинмай шушими майрал 9-мур кьини гьарца шинах бучIайссар ва гьайкалданучIа бацIан, паракьатсса оьрмулухлу жанну ду­ллуми дакIнин бичин.
Бадрижамал Аьлиева