ПатIимат Рамазанова

БУЦА НА, ЖЕГЪИРХХУЛЛУЙ
Буца на, жегъирххуллуй,
цIунил буттал шяравун,
НякI-талатисса ссавнийн
хъачIру щусса зунттавун,
Нуххарисса ххяллавух, кьаннайх,
маршрайх, рахIавух,
Лаккуясса хIукъулул
хьунийнсса дуланттавух.
 
Буца на, жегъирххуллуй,
буттал къатлул буххьуллийн,
Буттайн кунма икрам бан
яхIлий бавцIу къапулийн.
Гъидядизулул бургъил
гъили дурсса нузкьунттив,
Нурданун лархъсса кунна,
тамашалун ядишин.
 
Буца на, цIунил буца,
лувчIинкъатлувун буца,
ЛувчIинний бавал чIуних
чIувну мякь багьну бурча.
ЦачIун хьусса виримакь иттату итххяххарча,
Бавайн кунма варакъуйн
хъямала багьанхьува.
 
Буца на, хьхьичI бавкьуну,
пачкъатлувун, ларзулун,
Бавал кIунттил дургьумур
чIувин дан хъазамравун.
Хъювусса кIарттухь
яла бавахь буса-учинмур,
Мурчал хьувун лявкIуну,
бусланссара лув-ялув…
 
ЗАНА ХЬУРА ВИЧIАН

Зана хьура вичIан, ттул буттал улчай,
ЛачIал суннил чIапIал ссувхIатрал хъюлчай!
Неххал тийсса марщайх занай бур цулчIа,
Хъуннабавал бувсъсса магьрава бувксса.
 
КIийнмай, зунттул рахIув, ххютал аьнттуву,
Канай бур бярчругу дяинтту бувсса,
Кувссай чул бувну дур щиллив оьрчIшиву,
ШанчIапIал кIараллу бакIрацI бивхьусса.
 
ХIаллих шардай най дур хIалликъурату,
Мащай оьрму лавгсса ттул чIаххувкъари,
Кьунну га дуркIуна жуннийн дуссухун
НисирайччатI бувну, инил кьанкь дусса.
 
Шяраваллил тихун авчунни къужа,
Хъу-лухччах мякьнува ливчIра тIийнасса,
Щаращуй бивщусса щютIуххул чIуний
Архну щюлли ардай ччаву кьадиртсса.

КIарттуву цIу дихьлай дур ттулмур бава,
КIарттул ччатI ххирасса бутта учIаннин,
Щюлли хъюрув лихлай нагу щябивкIра,
Кьунниялай накь дан, цIуинт хIаласса.
 
Ттул дакI дуван, кIана барзугу лехлай,
Тархъаншиврул накьич ссавруннай чичлай.
Зунттахун бахьлаглай баргъ чIаларчагу,
ТIинттал пар гьан бувар къурнил хъачIрая.

ВА ВАТАН ЖУН ДУЛЛУ ЗАЛ
 
ПпабакIуйн баргъ щуну бур, 
Щуну-Зунттуй дюхлу дур. 
Жу Лакку билаятрай, 
Яйлагърай – зияратрай. 
Щюлли бартбису бувтун
ВацIилу бур къутI бивкlун, 
Ратlухсса цlуттуруллай
Чlимучlалтгу бур ликлай. 
ТтурчIи. ТтурчIайнна-Зунтту, 
НякI ттуруллавух лултту, 
ХIикматсса зурул чаннай
Караматну бур чlалай.
КIюрххи-кьуннил Къимизу
Бакбислай бур хьхьемаву, 
Хьхьев-хьхьев тIий, гьанай-гьанай, 
ЧIаракIлу дур щирикIлай. 
Жюр-жюр тIий ратIругу дур, 
Къявхъа тIий щаращив бур, 
Вайннул такьва-макьаннай
Жул макьугу дур дакьлай.
Лаккуйн биян къавхьуну
ДачIи шин хьурча ххину, 
Жун дуниял духлагай, 
Биян хьурча – цIу лагай!
НякI ссавнил, щюлли зунттал 
Дазурду хIала духхай. 
Ва Ватан жун дуллу Зал, 
Жул оьрчIангу ядакьай!
 
ДУХЛАРГУННИЯ ДАКЪАР ВА ДУНИЯЛ

Цумур-Щинал дагьанттувун буруглай,
Баргъ бур занай, ссахрив луглай,
кьус бикIлай.
Зунттурдащал, хъахъи лархсса ардащал
Адавращал кунма бура хавардай.
РатIухсса цIуттурлугу дур гьаз хъанай,
Ттуруллив кунна дакIгу дур оьлухълай,
Арцул варакьрал щинал макьангума
ЦIунцIулул такьвалий дуссар тти баллай.
 
БюрукъатIри буркьай къудурну чIалай,
Хъус-хъиншивурттал лагътуравух бакъа.
Ссутнил суратру дур Лаккуй гьар кIанай,
ЦукунчIавсса мурчал, дякъил хIахI бакъа.
 
НякI ссав. ЛивцIу щаращив.
КIюрхнил гьава.
Лерххун най дур шинну, янил ляпI чиннин!
НеххацIухсса ххяллул ялун гьаз хьура:
…Духларгунния дакъар ва дуниял! 
 
ССУТНИЛ ССУССИН ДУРНУ ДУР
 
Ссутнил ссуссин дурну дур
Лаккуй щюлли зунттал нур.
Ттуруллал чалагъайрду
Ссавнил ххануйн руртун дур.
 
Тихах, архний, зунттурдал
КIяласса къуттакьяпрайн,
Ссутнил хIахIлищал архIал
Щуну дур бургъил туран!
 
Щуну-Зунттул щюлли хъа
Хушрай хъахъимунищал
Даххана дарча бакъа,
Ччалан къашай ссутнищал.
 
Хъахъину кIяларххусса
ТIутIайн къеп тIий бур шярлу.
Ватандалул хIалалсса 
Нарза ласлай ттухлугу.
 
Намур гьанна ялавай,
Бигьашивурттал лагъну,
Лаккуйсса ссутнил нарза 
Уттигу къанясивну…
 
 ВАНА НА, АХИРГУ, ЛАККУЙНМАЙ БИВНУ

Вана на, ахиргу, Лаккуйнмай бивну,
Лаккуйн бияврия дакIгу ххарину,
Парадрайсса вирттал кунма зунттурду
Тайнна къилигъ дуну ссурулун щуну.
 
Шикку мурчан кIулссар на цурав, ттул цIа
ЛанцI учин ттул канийн най тана кацIа,
Шикку гьарнан кIулссар на щил буссарав,
Щил лащин дуссарив, чун най буссарав.
 
Шиккур ттул шардалу, шиккур рахIатшин,
Хьунаавкьсса гьарнал яхши-хашрал нур,
Гьарнанний хIадурссар ттун хъамалушин,
Къамачча къаригу шикку ттул нинур.
 
ОьрчIниява кIулссар циняв къапурду,
Кучардайсса чартту, чарил кIаланну,
КIана цIияллайхгу чIивидуш лечлай,
ЧIивиний на кунма, гадлущал гьанай.
 
Ттул оьтту-ттурчIава дукъаккай Ватан,
ЯхI бансса гуж ттувун инар бутайсса,
Щях бивщуний, багьний бучIара вичIан,
БунутIий вил кьуват нава хъин байсса!

ЖУ ЛАККУДУШРУРУ

Жу лаккудушруру, жул мина дуссар
ПпабакIу ссавнищал гъалгъатIи кIанай,
Аьсрурдал бардултсса чарттугу буссар
Къаралчитал кунма улча ябуллай.
 
Ци кьини лиркнугу лакрал халкьуннайн,
Бавахъулгу бувкссар му кьини лахъан,
Аьраяллил ардайн ва щюлли лухччайн,
Турлищал, мухIлищал – гьаз дуван Ватан!
 
Ххари-шадшивурттай
шахьлайнма бивкIссар
КIарттул ччатI – махIлагу, хъамалгу лахъан.
КIарттул ччатI – ниттихъал сахаватлувсса,
Хъамал ххирашиврул нахIусса лишан!
 
Жул дакIру кIукIлуссар бузмардан лайкьну,
Лачакран лавхьхьуну гъалгъа ттюнгъассар,
Жул чаргу иминссар, чаргудай гурссар,
Иш багьний жул махъру
къув-аьсну шайссар.

Жу лаккудушруру личIи-личIийсса,
ЧчантIулувун къавну цачIунмай шайсса,
Лакку кIанттулли жун кьуват булайсса,
ЗахIматсса лахIзардай дардру духIансса!
 
Лаккуя гьарчагу, жу, лакшиврия
Къалавгун, ядурссар лакрал лишанну,
ПпабакIул ва Щунул бюхттулшиврия,
Бавахъал дуаьрдур бургъил туранну.
 
ВАРАКЪАЛ ЛИШАН ДУССА
 
                «Дараччилул» душвавран
 
Щюлли интнийн щютI учин,
Мурчал бищай щютIуххи,
КIинтнихь уча ххуллухъин,
Насувча цила ххуллийх.
 
Жува чIаравн бияннин
ЧантI учинссар дараччив,
Никирттавун дияннин
Марххалттанивун дурхсса.

КIяласса баркьутрава
КIюла ликри аьч дуллай,
ХIаллицIух, кIинтнил бузма
Ччех гьантIиссар яларай.

Марххалттал тавханттава
ДуккантIиссар гюнгутIив,
Къищусса жалинт кунна,
КъитI диркIсса интнил тIутIив.
 
Ппив хьунтIиссар интнил хIахI
Гьарца ххяххиялува,
Варакъал лишан дусса
Дараччал аьтрилува.
 
МУНИЯТУ БУРАВАВ ДАКI ЗУНТТАЯ ДУКЪАЦЛАЙ
На бувссара, бувссара
дяинтту кIюрххицIунмай,
Мурчан ябивхьу къатрайн
чаннал туранну щайний.
Мунияту буравав
дакI тархъанну лявхъусса,
ЧанначIан кIункIу тIийнма
оьрму гьан буван ччисса.
Яхьуссара, хьуссара
Мурзу-Ххуллул ланттурдай,
Ялавайгу, лавайгу
нанинал ссалам ласлай.
Мунияту буравав 
уттигу вай шагьрурдай,
ЦIувкIул бунийн бачара
ххаришиврул хъаттирдай.
Хъун хьуссара, хьуссара
Аьсар-Ххяллул зункIуллай,
Ссавний цIурттачIан гъансса
бюхттул цIияллайх занай.
Мунияту буравав
дакI зунттая дукъацлай,
Ниттил каравн оьрчI кунма,
ЦIувкIравн кIункIу тIийнмасса?
 
 ***
Яттикъушлий ккаччи ххявххуний кунма,
Дяхьхьуниву макIлил ццах учин бунна:
«Ча бувкра!» учинсса чув къаливчIусса
ЦIувкIрав нава хьунна цIан-чаннавух най.
 
Щаращуйн най бияв щамарал хъачIрайх,
Ца кацIлул хIапвагу баян хьурдай тIий,
Ча-чунгу, ча-чунгу ЦIувкIуллал ардайх
БюрукъатIри бия ханну хъюлчай тIий.
 
Я Аллагь, мабара ттун танмихI оьсса,
МакIравагу ккаккан мабара ЦIувкIул
«Ча бувкра!» учинсса чув къаливчIусса,
Мурчал чIуний щяйтIант щютIа тIутIисса!
 
***
Ссавнил кIутIу бувунни
Ттуруллал халичартту,
ОьрчIкъакъунтгу ливхъунни
Ххарархху хьхьутул хьувун.
 
ХIаллицIух гъаралуннил
БайбишинтIиссар къиссу,
ТIутIазаннив тIутIалгу
КьарчI ритантIиссар хъачIру.
 
Интнил марцI-щюлли хьхьемай
ХъачIунттивгу шюршуну,
Барзунттал гьаз дантIиссар,
Буттахъал кунна, бакIру.
 
НА ЛАККУ ЗУНТТАЛ ДУШРА
 
На лакку зунттал душра,
Щюлли хьхьирилгу дусра,
Зунттурдалла, хьхьирилла, 
Чув-бунугу, лакралла.

Ца-цасса ккуччу бувссар
Чарттал бавкьу ххуллурду,
БакIларай архIал дирзссар
ЦIанттуруллал лиссурду.

ОьрчIнийра ххира хьуссар
Хъархъаллай – халватшиву,
Зунттал хъачIрай лирксса ссав,
Суннил минхълийсса шярлу.

Хьхьирил щатIал щурщулух
Ччя-ччяни вичIи дихьлан,
Хьхьирийсса ххяллал чулух
Дурссар мина, ликказан.
 
Хажалатрал ххартI дурний
ДакIнийсса ххаришиву,
Я зунттавун, я хьхьирийн 
Ябишайссар ттул ххуллу.

Шагьрулийгу – зунтталла,
Чан-кьанну хьхьирилгура,
Чув-бунугу, лакралла,
Илданий лакку чIура.
 
НА ШАЭР ХЬУННА ТIИЙ ЧИЧЛАЙ КЪАБИВКIРА
 
На шаэр хьунна тIий чичлай къабивкIра,
Ца хха къачивчуссар цIардайн тамахIну,
Ниттищал къурувппай буккай чIумалсса
Къакъабар шеърирдайн дурксса макьанну.
 
Улклул уртту-тIутIал шад щурщулувар,
ШанратIай щаращал чавхь-жюржулувар
На асарду лавсъсса щугълурду чичлан,
Щурщугу, жюржугу чагъардайн зизлан.
 
Буттахъал лухччиний хьхьепIатIи бувсса
ЧIиникIрал чIурдавар на такьва ларсъсса,
КIай авкьатсса зунттал бакIай тархъанну
Гьанагьисса мурчал ххурхху уртакьну.
 
Ялагу асарду лавсъссар на Лаккуй 
Къарил мурцIуиттав цIайтIи мукьава,
ОьвтIутIисса хханссар буттахъал рухIру
Бухсса дарвазарттал мюрш кьункьуллава.
 
Шагьрулий бунугу, хIура къадуркссар
Ттул дакIнива буттал кIанттухсса ччаву,
Гьарца ххуттавугу цIурхьхьу тIий дуссар,
Янсаврал кьанкь кунна, ягинсса къюву. 
 
На шаэр хьунна тIий чичлай къабивкIра,
Улклухсса ччаврилла чичлачи бувсса,
Бюхттул цIияллайсса бургъил парлилли 
Ттул шеърирдайх къалай паргалну дурксса.

НЮЖМАР ДУВАН ЧЧИВА МАЩИЛУЛ АРДАЙ
 
ЧантI учин ччива ттун ца кьини кIюрххил
СсурхIиял дазуцIсса магьлул мащилий,
Оьллугу ттивзуну дуркIсса буттарссил
Гъили накIлил оьрту чIарав бишайний.
 
Дюхлулул ках тIисса чIапIал щурщулий,
«НакIлия ххув уча!» миннат бувайний,
Аьтрилул аьнттуву ладиркI мащилий,
Телефонну, «сетьру», вай-фай дакъаний.
 
Зунзулчаннал тIинтту зунттал ланттая,
Хьхьем датIлай, хIаллицIух
ланцIа тIутIиний,
Бизанттай, рахIаву, ратIув, лагмава,
ЧIелмултрал хор дакъа, чIу-чIитI бакъаний.
 
Щюллисса хьхьемаву ччаннугу шюшлай,
Паммалул ттуруллайн хъирив хъанайний,
Нюжмар дуван ччива мащилул ардай,
Мурчайн лажин дугьлай,
бизанттайн лахълай.
 
Бизанттайн лахъайхту лихъайхха дардру,
Уртту-тIутIай чIалай оьрчIи бузмарду,
ШанчIапIал щатIава бакIру гьаз дурну,
НякIсса чани кIучIай някIуннаралгу.
 
Бургъищал, цIурттащал хаварду буслай,
ЧIимучIалт хъачIунттай щябикIан битлай,
Ца нюжмар дан ччива мащилул ардай,
Илкиншиврул чухъа ликъаклай занай. .
 
ККУРЧIА БАЙ КIИЧIИРТТУ ЧIЕЛМУЛТРАЙХ БУВКССА

Буссар Лаккуй, буссар, баргъгу гъилисса,
Гъараллугу дайссар чявхъа хIаласса.
Щархъурдуми дуссар, бавахъал тIийкун,
КкурчIа бай кIичIиртту
чIелмултрайх бувксса. 
 
Жуярва яхI бусса чарттугу буссар,
ЯхIирай бавцIуну чIиртту лекъакьан,
Инсантал ххал шайхту, шярултгу буссар
Ццах тIий, нигьабуслай, цивппа букъагьан.
 
Буттахъал алвагьсса цIардал хIурматран
ЦIияллугу дуссар кIяла тIутIаву,
МакIругу ккаккайссар хъув хIуй бавахъул,
Ягу ччатIру буллай лакку кIарттаву.
 
Я бияймур дуссар Лаккуй ятинну,
Гъараллугу дайссар чявхъа хIаласса.
Гьарай, буттал чIиникI сситтул бувкукун
Ци чявхъа бичайвав ттулмур дакIнивун?
 
ХЬХЬУТТАЙХ ЛАХЪУЛТРАЛ ДУШРА
 
ТтиликIрах – ццунсса вацIа,
Бяйкьинссара вацIлуву,
ХьхьичIрив – нигь рутай кунцIа,
ЧIахIлул щяпал бувцIуну.

Цимийлла на багьайсса
Бан-бит бакъасса дазуйн,
Лагътурал чухъри лархсса
ЛявкIусса ххютал чирчлуйн.

ДукъарчIайсса кьануннал
ДайлитIугур дакъасса,
Ххяппа дирзсса хIукмурдал
Ххарссари барча бакъа!
 
КIихIуллашиврул ардай,
Аьратталну хъита тIий,
Илкиншиву дур ччалай
Чидар букьлай, итххяхлай.
 
ТтиликIрах –  ццунсса вацIа,
ХьхьичIрив – ча-чунгу кунцIа,
Тараза кIунттил дугьай
Хьхьуттайх лахъултрал душра!
 
ДУСНАЛ ХIАСАН КIУРУХОВЛУЛ 
АЬПАЛУН
 
«Сив-сив тIисса гъаралу
Бяхълайнма бур вил улча», –
Вияр ххуйну, бюхханну
Учин къахьунссар ттуща.
 
Лаккуйсса гъи хIикматну
ТIутIан кIутIутIи дурсса,
«Ккулла кунма дакIницIун,
Ватан дакIницIун щусса».
 
Игьалавгхьунссара, дус,
Тти Вихьуллал майданнай,
Хордания яувцун,
Авлул хьуну хъархъаллай.

ДакIнил ларсъсса тIабиаьт,
Бюхттулний барзул гьава,
СсукIалавай уруглан,
ХIукмурдайнгу тарснува.
 
ЦIупарданул пар бусса
Назмурду чичлай урав,
Лагътурал чухъри лархсса
Жу дащуй бихьлай урав?
 
ДакIниву тархъаншиврул 
Чани лещан къаивкIсса,
ЩинчIав ххуй изаншиврул
Шеъригу къачивчусса.
 
ХIасан, КIуруххъал ХIасан,
Ссавнияр дакI илкинсса,
Чиплагънахьгу, да, инсан,
Жу буссару увкусса!

«Хъин къашай азар кунма,
Жун нясив бувсса улчай»,
Щукру хъун дуван Ватан
Лаккуй лявхъусса ХIасан!
 Кавычкардавуми ххару
ХIасан КIуруховлулли
 
ТТУЙН УТТИГУ ОЬВКУННИ
Ттуйн уттигу оьвкунни
Арттабиял бизанттал,
Къанай бурав увкунни
Бярних хIуриятIутIал?
 
Арийх бачIва ччаннащал
Хьхьемавух хIурхIа занан,
КIюрххил зунзулчаннащал
ТIутIал щатIавун лякIлан.
 
Тархъаншиврул хатI бусса
Хъархъаллайн, ххяллайн лахълан,
Явщул кьанкь янхьа тIисса
РахIавн, ратIавун бучIлан.
 
Зубил-кьунттул хъаралу,
Ххют дуний, чулгу бувну,
РахIат дурксса дакIнива
Щурщулий дуаь дуван:
 
Щукру, я ттул Заллу-Зал, 
Нава Лаккуй лявхъусса,
Вай тIутIал чани ттунма
Уттигу къалевщусса!