Дагъусттаннал машгьурсса пианист, ДР-лул Музыкантътурал союзрал председатель, АьФ-лул искусствалул лайкь хьусса ишккакку, профессор Хан Баширов лайкь хьунни Ккавкказнавусса Аьрасатнал Миллатрал Артийский комитетрал чулухасса «Золотой микрофон» тIисса наградалун.
Наградалун лайкь хьуми барча буллалисса шадлугърал мажлис хьунни июнь зурул 20-нний Сочилий Миллатрал культуралул центрданул къатраву. Хан Башировлул ва награда лайкь дунни дагъусттан миллатирттал культура ядавриву ва хьхьичIуннай давриву бивхьусса захIматрахлу.
Дунияллул Артийский комитетрал хIасул дурсса «Золотой микрофон» тIисса бюхттулсса награда дулайссар музыкалул искусствалуву хьхьичIуннайшивуртту хьун дурсса шаэртуран, музыкантътуран, теле ва радиокомпаниялул продюсертуран.
Культура ва искусство хьхьичIуннай давриву бакъассагу, билаятрал оьрчIал мурадру буручлачисса жяматийсса иширттавух чялишсса гьурттушинна даврихлу Хан Баширов лайкь хьуну ур дунияллул халкьуннал музыкалул союзирттал ишккаккултрал чулухасса цаймигу наградарттан.
ДакIнийхтуну барча дуллай буру Хан Мирзахановичлул ирглийсса награда. ЧIа тIий буру цIакьсса цIуллушиву, гихунмайгу зун-захIмат буллансса каши ва кьудрат.
Имара Саидова
