Мартрал 15-нний Вихьуллал шяраваллил школалийн бавтIун бия учительтал, дуклаки оьрчIал нину-ппу, шяравусса идарарттал зузалт, Ккуллал ва Лакрал цачIусса полициялул зузалт.Ва батIаву хас дурну дия махъсса ппурттуву интернетравусса «Синий кит» тIисса бала-хатIасса тIуркIулия буруччаврин.
Ва тIуркIулия цукунсса зараллу хъанахъиссарив бувсуна полициялул инспектор ХIусайханов Нариманнул. Ванал такну кIицI бувна:
— Компьютерттаву щурущи бувсса ва тIуркIу цалий къадарцIусса хасиятирттал оьрчIан хас бувсса тIуркIу бур. ТIуркIу тIурчагу, ва оьрчIан зарал биян буллалисса, хIатта га цала-цува оьрмулуцIа уван бюхъайсса кIанттайн иян уллалисса зат дур. БакIрая оьванмасса суаллу буллай, тIуркIулуву гьуртту хъанахъиманахь цала суратру диша тIий, буллусса суаллан жавабру гьан дувайхту, га «куратортурал» ххурххуппалу­хьхьун ириллай ур. ГаначIан гай гьан дуллай бур личIи-личIисса тестру, балайрду, суратру. Му ишираву оьрчIан бувчIлай ба­къар цува гайннал канихьсса «ссихьуйн» кIура аен уллалишиву. Гайннал буллалисса суаллан жавабру гьан къадулларча, оьрчI ур нигьа усан уллай, вил нитти-буттан, уссин, ссин та банну, ва банну тIий. Мунияту зула оьрчI-душарал хасиятирттаву хъана­хъисса дахханашивуртту янилу дикIан багьлагьиссар, — увкуна инспекторнал. ОьрчIру компьютердал балардая буруччаврия, гайннал кулпатравусса, жямат­равусса иш-тагьардая, хъуна-чIивинащалсса ихтилатир­ттая, аьркин дакъа оьрчIахьхьун нитти-буттал арцу дуллалаврия, оьрчIал, школа къуртал бувкун, дугьлагьисса касмурдая ва цаймигу оьрчIал оьрмулиясса ихтилатру, маслихIатру бувна: полициялул зузала ЯхIияев Назимлул, Вихьуллал школалул директор МахIаммадов Аьлиллул, учительтурал МахIаммадова Жинасатлул, Чаринов Оьмал, Аьшаев Салимлул, Шалласуев Багьдул, Амиралиева ХIурубичал, оьрчIал ппу Кьадиев ХIасаннул ва цайминнал.