Дагъусттаннал цIуллу-сагъшиву дуруччаврил министр (врио) Алиоьмар АхIмадовлул каялувшиндаралу хьунни Гъумуксса, буллай къуртал къабувнува ливчIсса азарханалул хIакъиравусса батIаву.

Муний гьуртту хьунни Лакрал райондалул бакIчи Зураб Куччаев, Халкьуннал Мажлисрал депутат Марат Илиясов, экономикалул министерствалул вакил Арсен Алирзаев, райондалул азарханалул хъунама хIакин АьбдурахIин Дибиров.

«Бур жула республикалий азарханарду, цимирагу ацIра шинай бувну къуртал бан къахъанай ливчIсса. Министрну авцIуния шинмай ттучIан чIявусса чичлай, оьвтIий бур Гъумук буллай лахъи лавгсса азарханалул ва цаймигу объектирдал ялув. Уртакьтуращал архIал жу бусса гуж ишла банну ва азархана бувну чулийн буккан бан», – увкунни Аьлиоьмар АхIмадовлул.
Гъумуксса азархана буллай байбивхьуссия 2003 шинал. ХIакьину Гъумуксса азархана зий бур ва журалул идаралун куну къадурсса, хъинну ссуссукьусса къатраву.