Гъумучиял Магьирлугърал къатлуву хьунни Бугьараминнал кьинилун хас дурсса байран. Ва байран цурдагу хьунни цал захIмат ва аькьилшиву район хьхьичIуннай даврил гьануну хьусса хъунмур никирал чулийннайсса хIурматрал лишанну. Мероприятие сакин дурну дия райондалул администрациялул ВТБ банкрал кабакьулуцIух.

Байрандалий гьуртту хьунни ВТБ банкрал директор Миронова Вера Николаевнагу.
Лакрал райондалул бакIчи Зураб Куччаевлул кIицI лавгунни жяматрал оьрмулуву хъунмур никирал агьамсса кIану бугьлай бушиву.
– ХIакьину жува хIурматрай хьунабакьлай буру цала захIматрайну, аькьилшиврийну, оьрму кIулшиврийну жува саргъунну оьрму бутлатаврил лишанну хьусса инсантал. Район хьхьичIуннай даврил ххуллий зу бувсса захIматран багьа бакъассар. Администрациялул чулуха зух аьркинсса аякьа ва къулагъас мудангу дикIантIиссар.
ЧIа тIий ура зун цIакьсса цIуллушиву, чан къахьуннав зул ужагърай тирхханну, – увкунни ванал.
Бувсунни Гъумук тIитIлай бушиву ВТБ банкрал филиал.

Байрандалийн бувкIминналгу барчаллагь увкунни райондалул администрациялул ва ВТБ банкрал вакилтурахь, жяматрал оьрмулуву цала бувсса захIмат кьадру-кьиматрай бушиврухлу.
ВТБ банкрал вакилтурал байрандалийн бувкIминнан бахшишругу дуллуну, бувсунни бугьараминнансса программарттая ва хIаллихшиннардая.
Байран тяхъа дансса программа хIадур дурну дия райондалул магьирлугърал зузалтрал.