Уттигъанну МахIачкъалалив хьунни Дагъусттаннал Ишбажаранчишиврул ва инвестициярттал агентствалул коллегиялул заседание.
Шикку ххал диргьунни ДР-лул Ишбажаранчишиврул агентствалул дурсса давурттал хIасиллу ва 2025 шинал махъсса 6 зуруй дуван ккаккан дурну диркIмунил масъалартту.
Коллегиялий гьуртту хьунни ДР-лул ХIукуматрал председательнал цалчинма хъиривчу Руслан Аьлиев, Дагъусттаннай ишбажаранчишиврул ихтиярду дуруччаврил вакил Мурад ТIалхIатов, «Деловая Россия» тIисса Щалагу Аьрасатнал жяматийсса сакиншиндарал региондалийсса отделениялул сопредседатель Русланбаг Каджимагомаев, бизнесрал вакилтал ва цаймигу.
Руслан Аьлиевлул тIимунийну, аьркинну бур ишбажаранчишиврул бутIуву конкуренция гужлан дуллан, мукунна республикалул районнай ва шагьрурдай бизнес лядуккан дуллан.
– Аьркинссар ишбажаранчитурахь цIухху-бусу буллан миннал тIалавшиннал, мюхтажшиврул хIакъираву.Телевидениялий аьркинссар дачин дуван «Ишбажаранчинал ссят» тIисса программа, миккун оьвчаван бизнесрал вакилтурайн. Цанчирча ми бакъа къашайссар экономика лядуккан дуван, садикру, школарду, социал инфраструктуралул объектру буллан, – увкунни Руслан Аьлиевлул.
Ванал мукунна ккаккан дунни агьаммур тема – «бизнес чаннайн дуккан даву». Мисал хIисаврай бувсунни МахIачкъалалив ашкара бувну бушиву закондалуцIун бакъавкьусса 4697 иш.
Дагъусттаннал Ишбажаранчишиврул агентствалул каялувчи ХIажимурад Исрапиловлул тIимунийну, давривусса приоритетирттавасса ца хъанай дур кIанттул бизнесраха зузими кIункIу баву. Ванал мукунма бувсунни бизнесрал ва властьрал дянив дахIаву дикIан аьркиншиву.
ХIажимурад Исрапиловлул тIимунийну, агентствалул сакин дурну дур кIанттул АЗС-ирттал вакилтуращалсса хьунабакьаву, миннащал маслихIат хьуну бур АЗС-ирттал дуллалисса хIаллихшиннал даража лавай буван.
Ванал хъин чулийсса кьимат бивщунни «Татнефть» компаниялул заправкалул комплексру Дагъусттаннай баврин. ДакIнин бувтунни гьашину, Дагъусттаннал бакIчинал тапшурлугърайну, бувантIий бушиву ишбажаранчишиву лядуккан дувансса хъунмасса форум.
– Ва форумрайн жува бучIан аьркинссару бизнесрал бутIувусса захIматсса масъалартту дузал бувансса балжисса маслихIатирттащал. ДакI дарцIуну ура форумрая кумаг хьунтIишиврий кунная куннан давуртту лахьхьин ва дахIавуртту дуван региондалул ва федерал даражалий, – увкунни Исрапиловлул.
Мурад ТIалхIатовлул бувсунни бизнесменнаща цукун лаизан бюхъайссарив ихтиярду дуруччайманал идаралийн кумаграл хъирив.
– Жуйн лаизан шайссар личIи-личIисса журардайну: цува увкIун, интернетрайхчил, почталийхчил, мукунма вакилнал жяматийсса приемныйрайхчил. Ми буссар МахIачкъалаливгу, Дарбантливгу. Вакилнал ихтиярдащалми буссар мукунма республикалул районнайгу, шагьрурдайгу, – увкунни Мурад ТIалхIатовлул.
Ваналва бусаврийну, дукIу вайннал идаралийн ишбажаранчитурая дуркIун бур 1100 лабизаву. Ми циняв ххал диргьуну, тавакъюрду бартбивгьуну бур. Гьашину 6 зурул мутталий вайнначIан дуркIун дур 600 лабизаву.
ХI.Аьдилов
