Лакрал райондалул бакIчи Зураб Куччаевлул каялувшиндаралу хьунни хар-хавар бакъасса иширттал комиссиялул батIаву. Ваний ххал бивгьунни тIабиаьтрал апатIрайну бивсса зараллу бухлаган баврийн ва гихунмай буруччинсса чаранну лякъаврийн багьайсса суаллу.

Зураб Куччаевлул кIицI лавгунни ЧС-рал кьаралданий циняв къуллугъру зун багьлай бушиву ххисса гужру цачIун бувну.
Райондалул бакIчинал хъиривчу Малик ХIусмановлул бувсунни тIабиаьтрал апатIрая махъ райондалий хIасул хьусса тагьардания.
Мартрал 28-нния апрельданул 6-ннийн бияннин райондалий ларчIсса рирщу гъараллая ва тачIав бакъачIин хъунисса марххалттая махъ чIявусса кIанттурдай ва ххуллурдай лахIунтту, валтру дагьаврийну захIматсса тагьар хIасул хьуну дур. Мамраш –Ташкапур – Араканнал ламу ххуллул участокрай (км 144 –168) найнна дур лахIунттацIа марцI буллалали­сса давуртту.

ЛахIунттацIа марцI бу­ккан бувну бур КIундия ЧIарав нанисса, паччахI-ххуллия ГьунчIукьатIрал шяраваллавун, Гъумуча Буршайн, КIуврав нанисса ххуллурду. Мукунма лахIунттацIа марцI буккан бувну бур Ххутрал ва Шуниннал шяраваллавунсса ххуллурдугу. ЦIу буккан бувну бур зарал хьусса щинаххуллурду.
ЦIанасса чIумал захIматсса тагьарданий бур Гъумуча Гъунив нанисса ххуллу. Хъанардал шяраву лахIуни дагьаврийну лавкьун бур Уриннал, Мукьардал, КIамахъаллал, Палассуннал шяраваллавунсса 35-41 километралийхсса ххуллу.

Ялугьлай бур «Дагавтодорданул» хIукмулух. Хъус духхай машинартту занан захI­матсса тагьарданий бур Щарату ШавкIравсса ххуллу. БахIи­кIуллал шяравунсса ххуллу бувтун бур цIу буккан бансса пландалувун. Хъунату Къурлав нанисса ххуллий зий дур кIусса техника.
ТIабиаьтрал апатIрайну хIасул хьусса тагьардания мукунма бувсунни райондалул бакIчинал хъиривчу Эльмира МахIаммадовалгу.
Гъумучиял электросетирдал каялувчи Зураб ХIажиевлул бувсунни лахIунтту дагьаврийну лахъисса чIумуй чани бакъа ливчIун бивкIсса тагьардания. Ури-Мукьардал шяраваллал чулийнмай нани­сса кIанттай лавхIуну бур зувива ттукIрал ттала. Хъанардал шяраву лахIуни дагьаврийну левкьун бур трансформатордал пункт. Баххана бувну бур ттукIрал тталлу. ЦIу дурну дур Къуруллал шяравун нанисса ттукIрал ­ххаллу. ­Буршиял, НицIавкIуллал, Аьхъардал ва Кьукуннал шяраваллаву бивхьуну бур ацIния мукьва ттукIрал ттала. Хъуннасса лагрулул даву дан лирчIун дур ттигу ттукIрал ххаллу цил тагьарданийн дуцин. ТIабиаьтрал апатIрайну зараллу бивсса къатрал тагьар ххал дан шаппа-шаппай лавгунни комиссиялул вакилтал: Кьурбан Дандамаев, Надир ХIасанов ва Абакар Акаев. Вайннал ххал диргьуну дур урчIва къатлул тагьар. Комиссиялул дартIсса сияхIрал гьанулий ххал бигьин тIий бур зарал бивминнан кумаг бансса чаранну.

Зулайхат Тахакьаева