Авторнал ва макьалалул хьхьичIмур бутIа чивчуну бур Бущихъиял райондалийн террористал ххявхсса гьантрай. «Новое дело» кказитрай ва бувккунни ларгсса нюжмардий. Да­гъусттаннал халкьуннал зумаккарччулумур жям буллалисса ва макьала, ла­кку мазрайн дурцуну, ришлай буру «Илчилийгу», Дагъусттаннай хъинну дакI цIуцIисса лаккучунал чивчумур жулва буккултрангу кIулну бикIувча тIий.

Къатри ччучлан диркIукун, анаварну цIу лещан дан аьркинни, пожарниктуращал къалмакъаллу къадуллай. Ва на гихунмай чивчумур цахъис хьхьичI, Дагъусттан кунпаякун хьуну, цIаннавун бюкьлай бавчу­сса кунмасса гьантрай, лайкь ба­къасса хавардуну чIалан бюхъайва. ХIакьину, талихIиннаран, тагьар къулай хъанан диркIунни, амма кризисрал дайдихьулийва ттул бакIраву загьир хъанан бивкIсса суаллу хIакьи­нугу яла къалавгунни.
Гьармур цилла кьаралданийрив хъанахъисса?
Айюх. Вай иширттал сававртту яла къадичирча, бандитътурал хъиривмур хIарачат бакIуйн къабукканссар тIисса вихшала нахIакьссар хьунтIисса. Укунмасса оьрмулуву республикалулгу, шагьрурдал ва шяраваллалгу каялувчитураясса жулла тIалавшинну, аьйрду гьарза­сса дикIай, амма ва ххуллухь ми аьй данну къуццу тIий бакъая. Ттул циняв суаллу цIана хъачIунттай чинну думиннахьри.
Степашиннул, бандитътурайн къаршисса операциялуву цуя-ца агьалинавасса инсаннан, цуя-ца аьраличувнан зарал къахьунтIиссар увкуну цаппара ссятру гьаннинна, жула виртталсса гьавалул аьралий гужирдал боевиктурал позициярдайх гужсса ракетарттал ва бомбардал рищаву дурну (мукун баян бувна цала), жула 4 милиционергу ивкIуну, 17ннайн щавурду диян дурунни. Учинссар, цумурбунугу дяъвилий шайссар мукунсса ишру увкуну. Бюхъай. Амма Первомайскалий кунма къашайхьунссар. Уттигурив ми ишру хъанайнма бикIантIисса?
Обороналул министерство ва МВД кIира шинал мутталий цивппа ябуллалисса налогрудулултрал бакIру къягърал буллай бия, цала циксса гьухъ рутIлай буссарив буслай, ттизаманнул журалий талан лахьлай. ЧIалан бивкIунни ми хъунисса хIарачатру ссайн бувкссарив.
Ттула, пайхаммаршиврул, ттун ххива жуйнма ххявхсса къачагътал бухлаган бансса, амма цинярда телеканаллавух буслай бур ми жула аьрщарая личин баврил операция най бушиву. Вана обороналул министрналгу бувсунни жяматрахь ми личин буллалишиву. КутIану учин: ламус хъанай бур бухлаган банча, личин буллай буру тIар.
Жувату цанияца бакIрал сагъну акъар. Я на, ягу къачагътал бухлаган бан къааьркинссарча, буккан банни аьркинсса тIутIими. 400 бущихъиял милиционернан щуркIал къавхьуну бухьурча цала чIарах, дарцумунил далухIилущалсса цурку акъача, ттуршахъул кIусса ярагъуннищалсса инсантал бувкшиву, цукунни миннал цалва къуллугъ биттур буллалисса? Ххал барча, инсантал биял къахъанай, тайннал дазуй так кIива къаралпост бивкIун бур (мукун бия баян буллай). Туну ми кIивагу пострай кIиттукIиттурша милица бухьунссия. Ци хайрди мукунсса къаралпостирдая, агарда миннан дазуйх нанисса щаллусса полк хIисав хъанай бакъахьурча?
Ссахари зий бивкIсса районнал ва шяраваллал администрациярттал бакIчитал, циняв низам дуруччай органну, цивппа агьали, агарда агрессия дайдишин цукссагу хьхьичI шяраваллавугу, лагмасса хъачIбакIайгу щиллив къакIулну къачагътурансса цIакьшивуртту дуллай бивкIхьурча? Шяравуния гьарца увкIма, гьар хъанахъимур кьюлтI бан къашай.
ЗахIматсса зунттал рельефраягу магьри буслан аьркиншиву дакъар. Къачагътурангуя га захIматссагу, зунтталгу диркIсса. Шиккува учин, аривгу жула цамур бала бусса бур – ххишала дакъа кьасса рельеф душиву. Туну хьхьирийгу дикIанссар цила захIматшиву – хъинну атилшиву. Цукунни ми захIматсса кIанттурдайх къачагътурал грузовикругу, бронетранспортердугу заназисса, разведкалун тIурча, гьавалулмунингу,  му къачIалачIисса? 400 райондалул милицанацIун ялагу цикссагу гужру ххи буллай бивкIун бунугу? Гьич бувчIин къашай.
Ттун къабувчIай, цукунни кIира хьхьичI ларсми шяра­валлацIун къачагътураща цайми шяраваллугу ласун бювхъусса? Цукунни жулва штурмовой авиациялуща тайннал цавагу автомобиль, бронетранспортер ххассал хьусса?
Гьавалул гужирдал командующийнал увкунни бандардащал талай шанма авиациялул полк буссар увкуну. Миннул гуж Хъун дяъвилул чIумалсса щаллусса гьавалул армиялул гужнияр чIивисса бакъахьун­ссар. Учин мукъун, авиациялуща сайки гьарца къачагънал хъирив да­гьан бюхълай бивкIун бур. Циванни му муксса бюхъу бакъа диркIсса? Циванни, жулла авиациягу гьаваллаву дунура, къачагътураща бюхълай бивкIсса цачIун батIлангу, ппив хъанангу, чуннив занангу?
Щил, цукун буручлай бивк­I­ссар аэродром, агарда бакIрайва, талатавуртту багьайкун дайдишиннинва, кIира вертолетгу ччурччуну, аьралуннаву ливтIуссагу хьуну бухьурча? Ялунссаннун, къачагътурал хъинну паракьатну щалва иширал сурат видеокамералийнгу ларсун дур.
Му дарсгу къагьахьуну дур, цанчирча ца гьантта лях лавгун, ца вертолет ялагу дуртун, шама хъунисса генералтурайнгу щавурду дирну дур. Генералтураща цаламур мюхчаншивурагу дуруччин бюхълай бакъар. Гайния кьюкьрал хьхьичI гьужумрай най бакъая. Му бакъарив начсса иш?
Миксса аьралгу, техникагу дунура, гьаваллаву так жулва гужру бакъа бакъана, цукунни къачагътураща бювхъусса яла агьамми лахъшивурттай буртти бикIан? Хъянсса зад бакъарив: телевизорданул экрандалий ккаккан буллай бур чIявусса цIурттигу чиннай бусса генералнан сситтулсса кIанттул агьалинал аькьлу лахьхьин буллай, чачаннал чулухасса ххуллу лакьин аьркинни, тичча къачагътуран кумаг биян буллай бур тIий. Цама зунтталчув гьалакну буслай ур, къачагътурал ккучунну цалла ккаккан дуллай унува, авиациялул тайннайх къарирщунни тIий.
Генералма так бакI кIутIу дуллай ур. Ци учинна ина вай хъанахъисса иширттая цаппара Москавуллал кабинетирттаву щябивкIминнал хайр ласласиссар тIутIиминнахь? Цукун щялу банна летчиктал машан лавсун бунутIийри вакссара авиация «эффективныйсса» тIисса тIарду?
Ва иш цуппава цукунни хьусса, ххяххан нанишиву щиятучIав кьюлтI буллай бивкIун бакъана? Цимигу нюжмар хьунахха циняв муния гъалгъа тIий, хIадур хьун ччарча, му къабюхъайсса зат бакъая.
Республикалий 14 азара яннаярагъуннивусса, аьралий пиша ла­хьхьин бувсса профессионалтал бунува, халкьуннал ополчение сакин даву – му цири, агьалинал чулухасса армиялул ккарччаравух рищаву дакъахьурча? Акъану жува Наполеоннул ххяххавурув дайщун дуллали­сса?
БучIиссияв хIадур къавхьусса ополченецтал хъирив кьинива дяъвилул цIаравун бичин? Вания 1941 шин дакъая, душмантал Москаву­ллачIан гъан хьусса.
БучIиссарив ополченецтурахьхьун сайки 1мур дунияллул дяъвилул заманнайсса карабинну буллан? Миннал колхозрал кьурувалурив­кьай ябуллантIисса ягу кьюнкьарахун бияннин ттизаманнул ярагъуннил балгусса профессионалтурайн – «дяъвилул ккаччайннив» миннан данди бацIан багьлагьисса?
Циванни къачагътурахь ттизаманнул ярагъ бушиврия гъалгъа тIийнмасса, жулами аьралуннахьгу, милицанахьгу къириммажардурив бусса? ЩичIари дусса артиллерия, авиация, бронетехника? ТайнначIа­рив­кьай, жучIарарив?
Агарда къачагътуралгу диркI­ссания авиация, ция бантIисса? Щак багьлай бур, му чIумал махъ бакъасса капитуляциялул актлилу къулбас дан багьанссия тIий.
Вана Дагъусттаннал телевидениелул хъанахъимуния тIайласса информация дулунну увкуну, ккаккан дурсса сурат.
Вертолет дур, цал гьаваллаву дарцIунугу диркIун, чуннив дагьну най. Вана луххал ттугъливух яра­гъуннил балгусса инсантуращалсса БМП чуннив бивгьуну най цайми ярагъбу ххуллул тияшия ци дуллалиссарив къакIулну суккукьютIу тIутIисса инсантурал чIарах. Вана чуннив грузовик никъа щуну най – мунил хьунин цамургу. Вайнна ялагу тикку, шикку, камуфляжравусса инсантурал ккучуккучунну тихашикка дуклай.
Ва ккурч, цуппа ца махъгу къаувкуну, ци дуллалиссарив бувчIингу къабувну, щаллусса ва тIайласса информацияр тIий ккаккан дурунни. Ттунма цал ссигу бивзунача, яла паракьат хьура. Информация, мяйжаннугу, щаллусса ва тIайласса хьунни.
Ттигъанну Индиянаву муххал ххуллий катастрофа хьувкун, транспортрал министр, расследование даннингу къаавцIуну, цува увккунни отставкалийн. Мунан кIулну тIий хьумунил жаваб стрелочникнайн къадуртун, цалла министрнал дулун аьркиншиву. Жулами тIурча, аьй зунттал рельефрайн рутлай бур. Райотделданул начальникная тIайла хьуну, генштабрал начальникнайн бияннин. Бю­хъай миннан орденнугума дулун. ЩинчIав пикривагу хьуншиву къакIулли ливтIуминнал оьттул хIакь хьхьичIвахьхьичI хъуни чиннавусса инсантурай бушиву, цала канилуми аьркинсса куццуй хIадур бан къабювхъусса, хьунмургу кIул бувну, аьркинсса хIукму хьхьичIва кьукьин къабювхъусса.
Амма вай иширттаву кIива зат бур ттулла дакI дацIан дуллалисса. Мугууттинин хъанахъимуния дакI дяркъуну дунугу, ополчениелувун бувхсса азарахъул арамтал, ва цилла мина кьаритан багьсса щарсса, хушрайчитуран тIайлабацIу чIа­тIисса, Аллагьнайн дуаь дуллалисса, амма къачагъталгу лихъан бувну, цилла ужагърайн кIура даенмур бува тIий бакъача… ополченецтурал бакIур­дия цурда ца чIара къадагьаннав тIий.
Мукун буссаксса, дагъусттан халкьуннан ссаятучIав я нигь дакъассар, я начливун къабагьантIиссар.
Ца ялагу. Цими шинни философтал ва политологтал Аьрасатнал жямат лагма лаган бансса, кризисрава буккаву мурадрай ми зузи бансса миллатрал идеялух луглай. Дагъусттаннай хьусса трагедиялул циняв миллатру цачIун бансса гуж ялун личин бувунни, му гуж ссахчIав машан ласун къашайссар. Му жунма ххирану бавцIусса багьа бакъасса ххазина жува, дяъви къуртал хьуну махъгу, ябан аьркинссар.

***
Ва макьала чирчуну барз ххишалагу хьунни. Утти, бущихъицIума­диял трагедия тикрал буллалисса ЦIуссалакралмургу трагедия хьуну махъ цири ххи бантIисса? Зурул хьхьичIва на бихьлай ивкIсса суаллу хIакьину цинявннал зумув бур, амма утти ЦIуссалакрал хIакъираву, оьванма къачагътурал парссапархха бан кьабивтсса.
Бачи утти Къизлар ягу Хасавюрт, ягу цамур кIану ласуннингу ялугьланнуча.
Цукунсса кьимат бищун­тIиссар аьралуннал начальниктурал устталугъран, душманначIа дакъасса авиациягу, артиллериягу, бронетехникагу ишла дурну, цакIива гьантлул дянив Къадардал зоналийсса боевиктурал цIакьшивуртту, цаягу аьс­карнал жангу кьурван къадурну, ххит дан къашайсса? Аьркин бакъар къачагътурал фантастикийсса цIакьши­вурттая магьри буслан. Ттизаманнул ярагъуннища ласун къашайсса къаларду бакъассар.
Цукунни паракьатну вичIи дишин­тIисса учшиврул хъячавайсса генералнал щялмахъирттахгу, ганая аьй лиххан бюкъавхъу хIарачатру буллалисса, гукуна увччусса унугу, ганаяр мазрал къухънасса вама генералнахгу? Аьрасатнаву бакъа, цурда ца цамур паччахIлугърай агьали ишла къабайссар къачагътурансса приманка хIисаврай. ТIайлассар, му къел Африканаву дайссар жанавартрайн авли бувксса чIумал. Амма авчитурал, жула генералтурачIа да­къасса духIиндарай, приманкалун инсантал къабайссарча ишла, гадри байссар.
Циняр телеканаллавух гъяргъяр тIий бур, жува «цинявннал увчIусса» гарант Буйнакскалий хьусса терактрал хIакъираву хъинну сситтулну ур тIий. Барчаллагь, аьзизсса буттай, паракьат бувунну. Миккува бусарча ччива, аьзизсса паччахIлугърал циван буллалиссарив цила агьалинай вай рахIму бакъасса экспериментру. Рязи хьунавав президент цала цанияца душнил арс хъамалу, укунасса гражданин хIисаврай, МахIачкъа­лалив тIайла уккан (Новолакрайн, Хасаврайн ягу лихъачувтурал лагерьдайн, бикIуча, къагьан анну). Жулва халкьуннан хъамал ххирархха. Бюхъай му чIумал танан цибунугу бувчIин. Бюхъай му чIумал бакIравун буххан, Чачаннаву цийнура цурда низам къахьуншиву, ацIазарахъул тахсир бакъасса инсантурая му политикалул задолжниктал буллангу къабучIишиву.
ПаччахIнал армиялуву генералтал цирича, мюрщими хIаписар­талгума цайнма цалва бивтун ли­тIайсса бивкIссар цибунугу ца цалла яхIлий ттангъа дурсса иш хьурча. Му аьдат цIу дуккарча, Аьрасат цила ВерховныйнацIагу, щалва генерали­тетрацIагу хьунссия. Ссан аьркинни кабинетрал генералтуран цайнма цалва битлан, миннал «яхI» буруччин жанну кьурван дуллалисса саллатIгу, окопирттавуми хIапи­сарталгу, ополченецталгу бунува?
Ми Москавуллал кабинетирттавусса агъатуран бувчIлай бакъар, ягу бувчIин ччай бакъар, цукунсса мина дихьлахьиссарив дагъусттаннал жяматраву, халкьуннахь ополчениялул дружинартту сакин дан дуллай. Ттул щак бакъар къачагътал ххит бан­тIишиврийн. Закон дишинтIи­шив­рийн. Амма мунищала архIал яла гьантIиссар дагъусттаннал халкь цачIун бан савав хьусса кьатIувмур фактор, хьхьичIун личинтIиссар гайра цакьнирасса социалийсса, миллийсса ва цаймигу, жулла республика цIарцIлай бивкIсса масъалартту. Ми ялунгу ярг хьунтIиссар, цанчирча лирмур дазин, зарал хьуминнан кумаг бан аьркинну бунутIий. Республикарив цамур тагьарданий ди­кIантIиссар, цанчирча ярагъ канихьсса ополчение – му дунутIий хьусса факт. ЦIанакул ополченияртту кIура даллай дур военизированныйсса структурардайн, миннуву цIакь хъанай дур каялувшиву, связь. Дакьаву хьуну махъ ми дакъа къахьунтIиссар, Дагъусттаннай бюхъайссар администрациярдал бакIчитурая мива «полевой командиртал» хьун. Щин кIул­ссар цала власть ядаврил иширттаву, республикалул хъуниминнащалсса хIакъихIисавраву, цала регионнал масъалартту ххал бигьлагьавриву ми закондалул ххуллий къуццу тIунссарив ягу гуж ккаккан буллан­ссарив? Щин кIулссар республикалул кьатIувгу ми куннайн кув щун буллансса гужру къалякъиншиву, Да­гъусттан лиян баву мурадрай?
Ттуйра щил аьй дарчангу, ттул щак бакъар жулва бигьа бакъасса оьрмулуву хIакьинусса уздансса ополчениярттугьунттийсса граждан дяъвилулгу, республика чачаннайн кIура даяврилгу потенциал душиврийн – МахIачкъалалив щяивкI­сса, цичIав бан къашайсса, ссалчIав жаваб дулун къашайсса жула «Масхадовгу» хIасул хьуну, республикагу питналувун дюкьан бюхъайшиврийн.
На аьйкьлай лякъиннавча.
Ислам Узалов,
ш. МахIачкъала
№40 «Илчи», 1999 ш.