Ттигъанну оьрмулул 70 шин там хьунни Лакрал театрданул труппалул хъунмур Какваева ПатIимат СалихIлул душнин, дурусну бачIи оьрму театрданун буллусса, цил захIмат тамашачитуран къачIаларчагу, гьарцагу спектакльдануву дакIнил бутIа бу­сса инсаннал.

Театрданул каялувчи Бадрижат МахIаммадхIажиевал мукъур­ттийну учин, ва бур гьарцагу спектакльданул гьурттучи, цанчирча хъунмасса захIмат бихьлай буну тIий, му хIадургу бувну, тамашачитуран ккаккан бан.

Театрданул зузалт дакIнийхтуну барча буллай бур цала даврил уртакь, театрданун бакъа чара бакъасса, цанма ххирасса инсан.

---

Бадрижат МахIаммад­хIажиева, театрданул каялувчи:
– ПатIимат бур гьарцаннал дусгу, ссугу, нинугу, жагьилсса артистътуран тIурча – вихшаласса гьалмахчу, дяъви барча, аьркинний чIаравгу бацIайсса. СахIналий бусса чIумал, гьарцаннан кIулссар цала чIарав вихшала хъуннасса дус, чул бищай кIану бушиву. Щала коллективрал ва бишайссар чумартшиврул ва захIмат ххирашиврул эбратран.
Жун ва ялагу кIулли цила арснал хъаннин ххаллилсса нину хIисаврайгу, кулпатрал аьдатру, тIювал гъилишиву дуручлачисса инсан хIисаврайгу. Цила ичIаллил тIюва дуручлачисса куццуй, дуручлай буссар ва театрданулмур тIювагу.

Гулизар Султанова, театрданул литературалул бутIул хъунмур:
– ПатIимат Какваева бур театрданул низам дуручлачисса кьянкьасса инсангу, цинявппа артистуран дакI хъинсса «нинугу». Зувиллий ххюра шинай цилла даврий зий ПатIимат, гьарца спектакльданул репетициярттай бушаврицIун, буссар гьарца актернащал рольданул текст лахьлай. Тамашачитуран хIисав къахьунну, щурщулий, дакIнийн бутайссар актернан хъамабивтмур. Мунищала архIал итталу бивтун буссар спектакль нанисса чIумал сахIналий хъанахъимур.

Аслан МахIаммадов, Дагъусттаннал халкьуннал артист:
– 1987 шинал, на институтгу къуртал бувну, махъунай театрданувун зана хьусса чIумал ПатIимат зий бия режиссернал кумагчину. Му тIурча, хъинну жаваблувсса давур, режиссернал урчIа кар. Ттунма хIисав хьуссаксса, шанма театр зузисса къатраву репетицияртту дансса кIану ва чIун лякъин къабигьасса ишри. Ва давугу ванил ххаллилсса даражалий щаллу дай. Ххаллилну кIулли ванин лакку маз, текст бакьин бан багьлагьисса иш бухьурча, му давугу ванил усттарну дувай. На учивияв, Лакрал театрданун режиссертурал кумагчитурал чулуха хъунмасса тIайлабацIу хьуссар куну. Ттун дакIния къауккай, аьпа биву, Давуд Давудов, гьарца пьеса дакIних кIулну бикIайва. ПатIиматлунгу гьарца пьеса дакIних кIулссар, репертуарданува бувкьмигума. Давриву цIакьсса низам дуссар. Му бакъассагу, ПатIимат бур Москавлив магьирлугърал ларайсса кIулшиву ларсъсса зузала, литературалул, драматургиялул ччимур произведениялия театрал ишккаккултрал даражалий ихтилат бан бюхъайсса пишакар.

Владиккавкказрай сий ду­сса фестивальданий, къашай хьуну, бучIан къавхьусса актрисан кIанттай сахIналийн бувккун, Москавлиясса жюрилун цуппа актриса бакъашиву ашкара къахьунну роль дургьуна ванил. Мунил исват буллалиссар ванил кIулшилул даража, дунияллия хавар бушиву. Ва ялагу бур жура-журасса хасиятирттал инсантал зузисса коллективраву гьарцаннащал маз лякъин бюхъайсса, ххаллилсса психолог. Ттун вания гьарца чулуха хъунмасса кумаг бур, дакI тIайласса инсан ва пишакар хIисаврай.

Саният Рамазанова, Дагъус­ттаннал халкьуннал артистка:
– ПатIимат ттул дакIнил лавсуна нава театрданувун зун бувкIсса цалчинсса гьантрайва. Гьарцаннал кIицI лагай ванил пишакаршиву, захIмат ххирашиву. Ттун тIурча, ччива кIицI лаган ва цума-цагу зузалал дакIния щин хIачIан шайсса бушиву. Жагьилтуращалсса ванил ара ляраличIисса дуссар – ваниха чIалачIин дакъассар. Жун хъуниминнангу ва ххишала бакъа ххирар, ххира хьун лайкьсса инсан бур. Ттун ххирар ванищал жап тIун ссая-бухьурчагу, магьирлугърая, театрдания бакъассагу, цайми арардаягу.

Ларгсса шинал ванил кIицI лавгунни «мусил хъатIи». На хIай­раннува бикIара вайннал кулпатрай – цаннан ца ччисса, бавкьусса, нахIу-хIалимсса. Мугу ПатIиматлул бюхъаврил биялар.

Луиза Шагьдилова, Дагъусттаннал халкьуннал артистка:
– «Ханума» тIисса спектакльдануву на бакъаяв кIиниязнахь ганал буцай душния цIарду дуллай, буслай? БайкъалитIавай цIарду дуллан бюхъанссар ттуща ПатIиматлуягу, хIатта ва на дурсса цIардах мюхтажсса инсан бакъахьурчагу. Къаххуйсса хасият ваниву сайки дурагу къалякъинтIиссар: хъамитайпа хIисаврай хьуннав, дакI хъинсса даврил уртакь хIисаврай хьуннав. «Ххазинай» куну бакъа зума къабахъайссар ва зузалтрахь. Хаснува на махIаттал-хIайран шара ванин жагьилтал ххирашиврий. Лагмава цинявппа буссар ттизаманнул жагьилтал жухава къалавхьхьусса бушиврия шикаятрай, ПатIиматлун тIурча, жагьилтурай аьй ришлаймавагу къаччиссар.
Ванил театрдануву дуллали­сса даврия бусларчарив, укунсса тIайлабацIу чIявусса театрдан къашайссар.

Юлиана МахIаммадова, Да­гъусттаннал лайкь хьусса артистка:
– Ца-ца чIумал ттун чIалан бикIай щала театр так ца ванил хъачIунттай бавцIусса кунма. ЦIуцIаву, буххаву цирив къакIулсса, ссалчIав лахIан къабайсса инсан бур. Вайксса шиннардий архIал зий ттун ва тачIав ссая-бунугу, щия-бунугу шикаят буллай къаккавкссар. Ванил театрдануву дукъавайсса даву дакъассар: лакку мазрая оьрус мазрайн текст таржума бан багьни, спектакльданул синхрон таржума дан багьни, бакъасса актрисахлу сахIналийн буккан багьни, ванил гьарца даву шархьун, кIанийн руртун дайссар. Репетициялийн лув-ялув чIал хъанахъисса, къаувкIсса актер режиссернал акъашиврий кIицI ува чирчагума, цукунчIав анавар къабуккантIиссар, цанчирча ганал кьинилул хIакь кьукьин най буну тIий.

Аьбдул Мурадов, Дагъусттаннал лайкь хьусса артист:
– ПатIимат СалихIовна бур жул ниттил кIану бугьлагьисса инсан. Ниттил куннасса дакI цIуцIавугу, аякьагу, дакIнил гъилишивугу асар шай жун вания. Репетициялийн ягу театр архсса аьрххилийн най, чIал хъанахъисса актернайн, дяъви бан анавар къабуккайча, ци хьурвав тIий, буруккинттарай оьвтIун бикIай. Барчаллагьрай ура оьр­мулуву укун аьмал ххуйсса, пикри чаннасса инсаннащал зун ттунма нясивну лякъаврийн.

Зинаида Чавтараева, Дагъус­ттаннал лайкь хьусса артистка:
– Цалчинна-цалчин, итталун дагьай урувгма хIайран уллалисса, пиш чан къашайсса ванил симан, дазу-зума дакъасса хъиншиву. Яла тIурча, ванил даврихсса ччаву, гьавас, лекъащайсса гъира. Ванил був­сса дяъвигума хъисвагу къабюххай, ванин жувагу, театргу цуксса ххирассарув кIулну тIий.
Жанна Оьмарова, театрданул каялувчинал кумагчи:
– Дахьва театрданувун зун бувкI­сса чIумал, ПатIимат Сали­хIовнал най бунува вихшалдарай кIункIу бувнав на цичIанма. Най бунува ххира хьуна ттун ва цуппагу. Ванил дакI хъиншиврул, инсантал ххирашиврул лагма цимурца чанна лахъан дувай. Яла-ялагу, хIайран бувару ванил артистурахсса, театрданухсса ччаврил. Му дазу дакъасса ччаву асар хъанай дур ванил увку­сса гьарца мукъуву, тIулуву, бивзсса шаттираву – ми цимурца ванил дувай дакIнийхтуну. Жагьилминналнияргу жагьилсса ванил дакIнил цинявннавун шавкь рутай.

ПатIиматлуя даврил уртакьтурал увкумунил ялун ххибан­сса бакъа чIаларчагу, учинна нагу кIива махъ. ТачIав дакIния къабу­ккай бявкъусса ноябрь зурул хьхьунусса лахъисса аьрххи, Дагъусттаннал кьатIувсса ттула цалчинсса командировка. 2002-ку шинал театрданущал най буссияв Владиккавкказрайн, Ухссавнил Ккавкказнал миллатирттал театрдал фестивальданийн. Чачаннавухмур ххуллу лавкьуну буну, гьан багьуна Ставрополлал крайрайхчил лахъисса ххуллийх, 27 градус дякъивух. Автобус ххуллий бавцIуссаксса хIаллай тIурча, дяркъу лапра ягин хъанай дия. Ттуйра лархмур личIаннин, гъили­сса зат ласун бакIрай къабавцIусса на га хьхьуну ссатиржан шаврия ххассал бувссара ПатIиматлул ларсун бувкIсса виргъандалул. Ттун тачIав дакIния къадукканссар та хьхьунусса ПатIиматлул аякьа. Аьр­ххилий нанисса жагьилтурал ялув бакIцIуцIаву дурну дия ванил, гьарцаннал ялун рутансса, гъилисса затру цищалла ларсун. Ниттил дакъа, мукунсса аякьа щилли дувайсса? Гьай-гьай, циван ккалли къабави, туну, жагьилтурал ва цала ниттин!