ХIакиннал пиша яла бусравмур бушивруцIун, жаваблушинна ва тIалавшинна ххишала дусса бур. Медициналул ххуллу язи бувгьусса унгу-унгусса хIакиннал бюхъугу, гьунаргу, хIарачатгу инсантурал цIуллушиву дуруччаврил цIанийсса бикIангу аьркинну бур. Укунсса хасиятру дусса унутIий бусравну ур Дагъусттаннал цIуллу-сагъшиву дуруччаврил министрнал бигарду бартбигьлагьисса хIакин Аьлиоьмар АхIмадов. 

Аьлиоьмар увну ур 1986 шинал апрельданул 24-нний ЦIуссалакрал райондалийсса Чапаево шяраву Камиллул ва СалихIатлул кулпатраву. Аьли­оьмар чIивину унува нитти-буттан ичIаллил давуртту дан кумаг буллалисса, даврия нигьа къаусайсса, цимурца кIул хьун ччисса оьрчI ивкIун ур.

Ванал ляличIиссара памятьрай махIаттал хьуну бикIайсса бивкIун бур учительтал. Школалийсса программа лахьхьин ванан хъисвагу захIмат хьуну бакъар. Медициналул чулухунмайсса гъира Аьлиоьмардун оьрчIнийва бивкIун бур. ЦIуллу-сагъшиврул хIакъиравусса цимурца кIул хьун ччай, суаллу буллай икIайсса ивкIун ур хъуниминнахьхьун.
Аьлиоьмардун дирзуну дур Берлиннайн ияннин талай ивкIсса ва къучагъшиврий жан дуллусса, ванал буттал ниттиуссил цIа. АхIмадовхъал тухумраву пахрулий кIицI лагайсса Аьли­оьмардул цIа хъиннура бусравну дур.
2003 шинал Аьлиоьмар, ЦIуссалакрал райондалийсса ЦIуссалакрал школагу къуртал бувну, дуклан увххуну ур Дагъусттаннал медициналул академиялувун. Ординатура бувккуну бур ванал билаятрай ца яла хьхьичIунмунин ккаллисса С. Н. Федоровлул цIанийсса МНТК «Микрохирургия глаза» офтальмологиялул центрданий. 2009 шиная 2011 шинайн ияннин хъирив лавну лахьлай ивкIун ур микрохиругиялул кьюлтIшивуртту. Шикку дуклакиссаксса хIаллай ккаккан бувну бур ванал цува жаваблувсса пишакар ушиву.

Клиникалий лавхьхьумуний гьашиву къадурну, 2015 шинал Аьлиоьмар увххуну ур МНТК-лул аспирантуралувун. Шикку ахттар дуллай ивкIун ур яруннан чани бучIан байсса технологиярттан хас дурсса диссертация. Ванал эмийсса диссертация практикалуву чялишну ишла дуллалисса агьамсса давуну хьуну дур.
КIулшивурттах мюхтажсса жагьилнал 2018 шинал бувккуну бур Аьрасатнал ПрезидентнацIунсса РАНХиГС-рал «ПаччахIлугърал ва муниципал управлениялул» магистратура.

2018-2021 шиннардий Аьлиоьмар зий уссия «Микрохирургия» МНТК-лул гендиректорнал кумагчину, поликлиникалул ва медициналул хIаллихшиннардал масъаларттал ялув ацIаву дуллай. Шикку ванан ххуйсса опыт хьуну бур, лавайсса технологиялул кумаг агьалинан къулайсса ва бигьасса куццуй хIасул бавриву.

Дагъусттаннал Яруннал микрохирургиялул центрданул хъунама хIакин язи угьлагьисса конкурс баян байхту, Аьлиоьмар гьуртту хьуну ур мунивух. Цинявппагу конкурсрай гьуртту хьусса хIакинтурава яла лавайми баллу лавсма хIакин ивкIун ур Аьлиоьмар. Мукун, 2021 шинал ва Центрданий каялувшиву дан вихшала дурну дур Аьлиоьмардуйн.
Ванал каялувшиндаралу цIу буккан бувну бур Центрданул материал-техникалул база, ишла дуллан бивкIун бур диагностикалул ва хъин баврил цIу-цIусса методикартту. ХIасил, Центрданий яруннал азарду хъин даву бакъассагу, жагьилсса пишакартурал квалификация ларай даву мурадрайсса базагу хIасул хьуну бур.

Аьлиоьмар ур медициналул элмурдал кандидат, цIа дурксса хIакин ва медициналул даву хьхьичIуннай хъит учин дуллалисса каялувчи. Аьлиоьмар Республикалул ЦIуллу-сагъшиву дуруччаврил министрну итвсса баяйхту, соцсетирдай цинявппагу, ца зумату кунма, бия ванайн: «ххаллилсса инсан», «гьунар бу­сса хIакин», «икIайкунсса профессионал», «медицина лайкьсса ва жаваблувсса инсаннал каруннахьхьун дуллунни» тIий.
Аьлиоьмардул чIивима уссил Русланнул язи бувгьуну бур нитти-буттал пиша. 2025 шинал ва ивтун ур Къизлар шагьрулийсса медколледжрал директорну. КIиягу уссил язи бувгьу­сса пишардал дахIавугу цIакьсса дур: Аьлиоьмар ур халкьуннал цIуллу-сагъшиву дуруччаврил жаваб дуллай, Русланнулмур давугу дур къашайшалт хъин буллансса кадрарду хIадур бавриха зузисса.
Бартлаганнав цинявппагу умудру!

Имара Саидова