1999 шинал сентябрьданул 5-нний Басаев ва Хаттаб бакIчисса дунияллул халкьуннал дянивсса къачагътурал кьюкьри ххярхссар чачаннал аьрщарая ЦIуссалакрал райондалийн, яла къизгъинми дяъвилул ишругу най бивкIссар гьамин ЦIуссалакрал райондалий.

Боевиктурайнсса яла гужмур къарши бацIаву дурну диркIссар шикку. ЦIуссалакрал шяраву кIанттул милицалтрал ва Липецкаллал ОМОН-далул кьюкьа цIакь хьуну диркIссар РОВД-луву ва Культуралул къатраву. Боевиктурал умуд бивкIссар ми кIивагу кIану цала кIунттихьхьун ласунсса ва цайнма къарщину бавцIуми ясир бансса. Амма миннал хиял ссайнчIав къабувкссар, ми гъагъари бувссар Муслим Даххаев бакIчисса жула вирттаврал. Нюжмардул мутталий къизгъинсса талатавурттугу хьуну, ахиргу, экстремистътал дардагъил хьун бувссар. Гьай-гьай, хьуссар бивщуссагу, ливтIуссагу жула ополченцынал ва федерал аьралуннал кьюкьраву. Телевышка дусса лахъазанттуй махъва-махъсса ккулла бухлаганнин талай бивкIсса Халид Мурачуев ва Мутай Исяев лайкь хьуссар Аьрасатнал Виричунал цIанин.