Бархъаллал ххуржинтту Аьрасатнал кьатIаллил иширттал министр Сергей Лавровлул хъарайн дирчушиву бувсунни республикалул экономикалул ва территориал развитиялул министр ХIажи Султановлул цала телеграм-каналданий.

Ва иш хьуну бур Аьрасатнал МИД-рал Культуралул центрданий Дагъусттаннал презентациялий. Аьрасатнал халкьуннал мастер, Дагъусттаннал культуралул лайкь хьусса зузала ПатIимат ХIаммадова ва ванил ссу, МахIачкъалалив «Дагестанский аул» тIисса музейраву зузисса Маизат, бивкIун бур ва презентация дуллалиминнавух. Сергей Лавров экспозициялул ялтту уклакисса ппурттуву, Маизатлул Бархъаллал аьнтIикIасса ххуржинтту пишкаш дурну дур Лавровлун. Ваналгу, гацIана хъарайх рирщуну, бавтIцири шад бунни.
«Нину дикIайва, Сергей Викторович уссиха хъинну лавхьхьусса ур тIий, телевизорданувух му гъалгъа тIисса чIумал, личIлулну вичIи дишайва бусласимуних, хIатта цIусса хаварду бусласисса чIумал телевизор лахъайва, Лавров ккаккарчангу тIий. Ниттил хиял бия Сергей Викторовичлущал хьунабакьинсса», – бувсунни ссурваврал ХIаммадовхъал тIий, чичлай ур ХIажи Султанов. Ниттил мурад щаллу бувсса Маизатлул цилла карунних щаршсса аьнтIикIасса ххуржинтту пишкаш дурну дур.
ПатIимат ва Маизат цIанихсса фольклорист, этнограф, Аьрасатнал халкьуннал мастер, Дагъусттаннал, Чачан-Ингушнал ва Къабардин-Балкьарнал культуралул лайкь хьусса зузала Къачу ХIаммадовлул душрур.

ПатIимат Рамазанова