Дусшиврул къатраву МахIачкъалаллал школарду ххуйну къуртал бувсса оьрчIру барча буллалисса мероприятие хьунни июль зурул 15-нний. ОьрчIру, нитти-буттахъул ва учительтал барча буван бувкIун бия шагьрулул мэрнал къуллугъ чIумуйну бартбигьлагьисса Жамбулат Салавов, ванала хъиривчу, шагьрулул КIулшиву дулаврил управлениялул хъунмур Эмилия Раджабова, Халкьуннал Мажлисрал Элмулул ва кIулшиву дулаврил комитетрал хъунмур Елена Павлюченко, Республикалул кIулшиву дулаврил ва элмулул министрнал хъиривчу ХIажимурад МахIаммадов, жяматийсса ишккаккулт ва цаймигу бусравсса инсантал.
Гьашинусса дуккаврил шин къуртал дурну дур 2000-нниха ливчусса оьрчIал, вайннава 522 оьрчI лайкь хьуну ур «За особые успехи в учении» тIисса медальданун, 17 оьрчIал ЕГЭ-лий 100 балл лавсун бур, 150 оьрчIал – 90 баллдануяр лахъсса.
Жамбулат Салавовлул цала ихтилатраву личIинува барчаллагьрай кIицI ларгунни МахIачкъалаллал 39-мур лицей къуртал бувсса МахIаммадова Саидал ва ХанмахIаммадова Заремал цIарду. Вай душваврал кIиннилагу ца ЕГЭ-лул 100 балл лавсун бур, гамур экзамендалул – 95-99 балл.
Эмилия Раджабовалгу чIурчIав дунни уттиния тинмайгу цивппа школа къуртал бувминнал чIарав бушиврий, билаятрал цуми вузирдавун дуклан буххарчагу, оьрчIал цала школарду къуртал бувсса шагьрулул цIа-кьини гьаз дуванну гихунмайгу къуццу тIунссар тIисса умудгу бушиврий.
ПатIимат Рамазанова
