Жул дянив ца яла бусравмур
ДакIнийхтуну барча дуллай буру жулва коллега, дакI-аьмал хъинсса, гьарцаннащал хIал бавкьусса, цума-цанналгу чIарав бацIан махъаллил бакъасса, цила дуллалисса давриву усттарсса, мукъуй цIу бусса, бивзний ша бавкьусса Зинфира ХIажиевал юбилей.
Зинфира коллективрал дянив хьхьичIуннугу, ххиранугу буссар.
«Илчи» кказит тIивтIуния шинмай Зинфира хIура къавхьуссар цинна ххира хьусса даврия. Ванил биялсса бутIа буссар миллатрал кказитрал даража лавай бавриву. Кказитрай дахханашивуртту хъанан дикIайхту, цIусса давугу лархьхьуну, цIанасса чIумал Зинфира вава бюхъулий зий буссар дизайнерну, цила творчествалул потенциал кказитрал чIалачIин ххуй давриву хъиннува усттарну ишла буллай. Ванил жагьилсса душваврал насихIатчи хIисаврайгу бувайссар чIумунгу, кIанттунгу лавхьхьусса аькьилсса маслихIатру.
Юбилейгу барча дуллай, чIа тIий буру Зинфиран, жула даврил уртакьнан, цIуллушиву, кулпатраву нахIу-хIалимшиву, оьрмулуву тIайлабацIуртту. Ина ванияр тихунмайгу вила мачча-гъанналгу, лагма-ялттуминналгу дянив бусравну, дунияллия ххарину битаннав!
«Илчилул» коллектив
МарцIсса дакIнил заллур
ДакIнийхтуну барча дуллай буру «Илчилул» корреспондент Залму АьбдурахIмановал юбилей. Ва, редакциялул чIявуми зузалт кунма, ДГУ-лул дагъусттан филологиялул факультет къуртал бувсса душри. Ванил канила дуркссар чIярусса дюрхъусса, пасихIсса ва куртIсса макьаларду. Буккултран найдунура дурчIайссар ванил чичрулул кьяйда, хьумунил хIакъиравусса цилвамур пикри усттарну аьч бувайсса, чIявуссаннал янилун къадагьанмунил хIисав ласайсса. Оьрмулувугу ва укунма анавар къабуккайсса, учаймур пикри бувну, куртIну хIисав ларсун ва ссавурданий учайсса инсанни.
Зунттал щаращул щин куннасса марцIсса дакIнил заллур, аьчухсса, архIал зузиминнангу, лагма-ялттуминнангу так хъинмур, ххуймур хьуну ччисса. Коллективраву бавкьусса, иминсса, иш багьний учаймургу кьянкьану учайсса. ТIайламур ччисса.
Кказитрал социал сетирдайсса ца хъар ларсмургу Залмур, Телеграм-каналданийсса «Илчилул» майдандалул кIулагу, биялагу ванихьри. Гьамин, ванил хIарачатрайнур «Илчилулмур» Телеграм-канал хьхьичIунминнувухсса.
Жу щукрулий ва пахрулий буссару Залму АьбдурахIманова жулла кьюкьлуву бушиврия. Миллатрал маз, культура, колорит ядаврил ххуллий лажин кIялану зий бушиврия. Цимурцаннул хIакъираву буса-учинмур мудангу бусса, багьайний багьайкун махъ учайсса, граждан позиция цIитI битайсса бушиврия. БакI-чурххалгу бювхъусса, ккаккан авурсса, аслийсса лаккудуш бушиврия. ЧIа тIий буру ванин цIакьсса цIуллушиву, дуллалимуниву тIайлабацIу. Цуппа ххираминнащал ва цинма ххираминнащал уттигу тамансса юбилейрду хьунадакьлансса талихIрал мутта!
«Илчилул» коллектив
Президентнал цIаниясса грамоталун лайкь хьунни
Ларгсса шинал ахирданий Аьрасатнал президент Владимир Путиннул наградартту дуллунни давривусса хьхьичIуннайшивурттахлу ва чIярусса шиннардийсса захIматрахлу. Вайннавух ия жула лаккучу, Мираблул арс Илиясов Сяидгу, Москавуллал «Технический заказчик Фонда развития территорий» тIисса идаралул Региондалул проектирдалсса буллалисса управлениялий зузисса.
Аьрасатнал президентнал цIаниятусса ХIурматрал грамота Сяидлухьхьун дуллуна билаятрал ХIукуматрал хъунаманал хъиривчу Марат Хуснуллинлул.
Сяид Илиясовлул Михаил Ломоносовлул цIанийсса МГУ-лул юристътал хIадур байсса факультет къуртал бувссар, цувагу Дунияллул халкьуннал дянивсса ихтиярдал ассоциациялул членни. Аьрасатнал агьалинан ва ххуйну кIулссар оьрус мазрай тIайлану чичин лахьхьин буллалисса машгьурсса проект @gramotarus хIасул дурману ва администраторну. Ва проект личIинура сийлий дур гъалатI бакъа, марцIсса оьрус мазрай чичин хIарачат буллалисса студентътурал ва учительтурал дянив. Гьунар бусса ушивруцIун, буниялану захIматгу бихьлахьисса жагьил ур.
ХьхьичIва Сяид щалагу Аьрасатнал даражалийсса журналистикалул «ПРО Образование -2021» конкурсрайгу ххув хьуссия. Ва билаятрал 70 региондалиясса 800 инсан гьуртту хьусса конкурсъя.
Барча тIий буру, Сяид, вин хIукуматрал дуллусса ларайсса наградагу, чIа тIий буру вин цIуллушиву, дуллалимур уттиния тихуннайгу бартдигьлансса каши ва кьудрат.
ПатIимат Рамазанова
