Февральданул 1-нний Аьрасатнал президент Владимир Путиннул бувсса Указрайн бувну, лакрал хьхьичIунсса вакил, техникалул элмурдал кандидат, 1-мур классрал пилот, ДР-лул транспортрал лайкь хьусса зузала, «авиакомпания «Дагестан» ООО-лул гендиректорнал маслихIатчи, Акбардул арс Жабир Абакаровлун дуллунни «Аьрасатнал Федерациялул транспортрал лайкь хьусса зузала» тIисса хIурматрал цIа.
Бусравсса цIагу барча дуллай, чIа тIий буру Дагъусттаннал ва лакрал миллатрал лайкьсса арснан цIуллушиву, цIу-цIусса тIайлабацIуртту, дуллалимур вания тихуннайгу лажин кIялану бартдигьлансса каши ва кьудрат!
«Илчилул» редакция
Жабир увну ур Хъусращиял шяраву. 1971-ку шинал увххун ур Рязаннал областьрайсса Сасовский летный училищалувун.1984-ку шинал бувккуну бур Дагъусттаннал политехнический институтрал инженер-механик шайсса факультет. 1988-ку шинал къуртал бувну бур Ленинградуллал граждан авиациялул академия. 1973-ку шиная шийнмайсса ванал щала оьрму бавхIуну бур авиациялуцIун.
Зий ивкIун ур Ан-2 самолетрал кIилчинма пилотну, командирну, Ан-24 самолетрал кIилчинма пилотну, Ан-2 ва Ан-24 самолетирттал эскадрильялул командирну, леххаврил кьюкьлул командирнал хъиривману, 2004-2011-ку шиннардий – «Авиалинии Дагестана» ФГУП-рал гендиректорнал цалчинма хъиривчуну. 2011-2012-ку шиннардий — «Авиалинии Дагестана» ОАО-лул гендиректорну.
КIира шинай ва уссия цалла хIасул дурсса «авиакомпания «Дагестан» ООО-лул гендиректорну зий . ЦIана Жабир Акбарович ур ва авиакомпаниялул гендиректорнал маслихIатчину.
Февральданул 12-нний 1955-ку шинал ЦIуссалакрал райондалийсса Чапаево шяраву Цалчинмур ЦIувкIратусса Исмяил ва ПатIимат Халиловхъал кулпатраву бувну бур 4-мур душ Сиясат. Ва кулпатраву 9 оьрчI бивкIссар.
1973-ку шинал школагу къуртал бувну, Сиясат Дагъусттаннал паччахIлугърал университетравун дуклан бувхссар, амма, дуккаврил бюхъу бусса, итххявхсса бунугу, къашай хьуну, вуз кьабитан багьссар.
Хъирив шинал щар хьуну, Къазахъисттаннайн, Гурьев шагьрулийн бивзссар. АцIра шинай Узбакисттаннай, Агрен шагьрулий, зий бивкIссар кинотеатрданул администраторну, машлул даврий. Цуппа зузисса кIанттурдай бусравну бивкIссар, хIурматрал лишаннан лайкь хьуссар.
1993-ку шинал, захIматсса операция бувну мукьах, Ватандалийн зана хьуссар. 2000-ку шиная шийнмай зий буссар Финансово-экономический колледжрал производствалул хъунмурну.
Сиясатлун, ласнаягу личIи хьуну, 3 арс ва 1 душ цила хIарачатрай ччаннай бацIан буллан багьссар.
Ци захIматшивуртту духIан багьарчагу, ванил арсру ва душ лайкьну чивун буккан бувссар, арснал хъамигу душнияр личIи къабувссар. ХIакьину Сиясат 15 оьрчIал оьрчIал хъуннабавар. Ванил наслу эбратран бишин лайкьссар.
Жун цинявннан бишин-битан кIану бакъа ххирасса ссу, нинуй, хъуннабавай, буттарссий, ниттирссий, Сиясат! Барча вил юбилей! Жу вия пахрулий буссару, виву дуну тIий жула ппухълуннал яла ххуйми хасиятру. Гъан-маччаминнахсса ччаву ина вилва наслулувугу дирхьунни. Жун кIулли, жунма кумаг, аякьа аьркин хьусса чIумал, жущава сивсуну вийн буккан хьунтIишиву, инагу шайкун жула чIарав бацIантIишиву. Вил кьимат жучIа лахъссар. Мудангу цIуллуну, оьрмулия ххарину ккаклан ччай буру ина. Лахъину ва талихIрай яхъанансса цIуллушиву, ххари-хъиншивуртту чIа тIий буру вин.
Вил кулпат
