Гъинттулсса каникуллу дайдирхьусса гьантрай Дагъусттаннал цинявппагу шагьрурдайсса ва районнайсса мизитирттаву тIивтIунни оьрчIан Кьуран буккин, чак бан лахьхьин буллалисса уквасса курсру.

Вай курсирдай оьрчIахь буслантIиссар нитти-буттал, хъуниминнал ва лагма-ялттуминнал чулухунмай хIурматрай-кьиматрай бикIансса насихIатругу. Курсру тIивтIунни ДР-лул Муфтиятрал ва «Инсан» ихIсандалул фондрал сипталийну.
Июнь зурул 11-нний шадлугърал тагьарданий тIивтIунни вай курсру МахIачкъалаллал Хъун-мизитраву. Дагъусттаннал МуфтиятрачIасса КIулшивуртту дулаврил отделданул хъунама Юсуф Аьбдулмуслимовлул бувсунни оьрчIахь диндалул элму мюрщину бунува лахьлан аьркиншиву. Ванал цала насихIатирттаву кIицI лавгунни дусшиву, цашиву ва уссушиву исламраву мудангу лавайсса кьиматрай душиву.
Цалчинсса кьини курсирдайн бувкIсса оьрчIайх дарчIунни нацIу-кьацIу. Щаллу дунни нашидру, лавхъунни махъру, дунни исламрал кIулшивуртту аьч дуллалисса викторинарду. ТIайласса жавабру дуллусса оьрчIан дуллунни бахшишру.
ОьрчIансса курсру зунтIиссар июньдалул 12-нния августрал 15-ннийн бияннин, нюжмардий ххюра кьини. БайбишавантIиссар курсру ссят 9-нний. Курсирдайн кьамул буллалиссар 7 шинава тинмайсса оьрчIру ва душру.

Имара Саидова