Аваданни гьунардал Хъуращиял щар. Ва буллугъсса аьрщарай, гьунар бусса кулпатраву бувну бур Дагъусттаннал эстрадалул артистка, чIугу, бакIгу, дакIгу ххуйсса жула Зарипат.

Вай гьантрай «Ванесса» залдануву хьусса ванил концерт ххаллилсса бахшишну хьунни цинявппагу Зарипатлул балайрду ххираминнан. Зал бия бувцIуну. Зарипатлул мажлис хъун бан бувкIун бия ванил уртакьтал – тамашачитуран нукIува ххира хьусса Дагъусттаннал артистътал. Мажлис гьар муданма кунма, цIу буну бачин бувну ия ва даврил опыт хъунмасса Дагъусттаннал Чичултрал союзрал лакрал секциялул хъунама Супиян Оьмаров.

Зарипат барча буллалисса ихтилатру бунни Дагъусттаннал ЦIуллу-сагъшиву дуруччаврил министерстволул хъунмур эксперт Рита Мурачуевал, Муххал ххуллул азарханалул хIакин МахIаммад ХIажиевлул, Дагъусттаннал лайкь хьусса строитель Зиябуттин ХIажимирзаевлул, «Илчи» кказитрал зузала Андриана Аьбдуллаевал ва м.ц.
Шиккува кIицI лаган, Зарипат цаппара шиннардий «Илчи» кказитрал корреспондентну зий буссия. Шикку зий бунува къуртал бувссар Дагъусттаннал университетрал филологиялул факультетрал журналистикалул отделение. ХIал бавкьусса, дакI аьчухсса Зарипат жул коллективран ххирассия. Артистналмур пиша ялтту бувккун, жучIавату гьарчагу, жу хIура къадарду ванищалсса дусшиврул арарду.

Тамашачитурал неъмат лавсунни, Зарипатул бакъассагу, Шагьалай МахIаммадовал, Зумрут Мусиевал, Жамиля Аьбдуллаевал, Аьбдул Мурадовлул, Ссамад Буттаевлул, Залиххал, Ямлихан ХIажиевлул, Зухра Адамовал балайрдая. Щала концертрай макьаннугу руцлай ия, ххуйсса балайрдугу увкунни Амрет Х1усайнаевлул.
Рязисса тамашачитурал цIания Зарипатлухь барчаллагь тIисса, ванин ттиния тийнмайгу илкинсса ххуллу чIа тIисса ихтилат бунни Ккурккуллал шяравасса хIакин Ханича Аьлиевал. Зарипатлул концерт хьунни хIакьсса лакку байран.
Тамашачитурал бахьлаган бунни Зарипат тIутIавун.

Андриана Аьбдуллаева