[dropcap]А[/dropcap]ьдатравун дагьсса, дуккаврил шин дайдишиннин хьхьичI дувайсса, конференциялийн бавтIун бия Ваччавсса Культуралул къатлувун августрал 25-нний Ккуллал райондалул кIулшиву дулаврил зузалт.

ХIажимурад ХIусайнов
Конференциялий гьуртту хъанай бия КIулшиву дулаврил министерствалул пишакар Аммаева Асли, райондалул бакIчинал хъиривми Чупанов Адам, Чаринов МахIаммад, райондалул депутатътурал собраниялул председатель Оьмаров Гъази, Халкьуннал Мажлисрал депутат Расулов Аьбдуллул кумагчи, нукIува Ккуллал райондалул УО-лул каялувчину зий ивк1сса АхIмадов Шамил.
Конференция тIиртIуна УО-лул каялувчи ХIаммакуева Альби­нал. ДукIусса дуккаврил шинал ахиратравун лавгсса учительтурал цIарду абад дуллай, лавай бивзун, минутрайсса кьабагьаву дуруна. Ялун нанисса дуккаврил шинащал учительтал барча бувуна Аммаева Аслил, Ккуллал райондалул бакIчинал хъиривманал Чаринов МахIаммадлул. Хъирив Ккуллал райондалул УО-лул каялувчинал ХIаммакуева Альбинал бувуна гьарза-гьартасса доклад. Цила докладрал ахирданий ванил чIа увкуна цIусса дуккаврил шинал дуклаки оьрчIан ва учительтуран тIайлабацIуртту ва чIумул тIалавшиннардацIун шару ласлансса тавпикь.
Чансса оьрчIру дуклаки­сса школарттай цукун дар­с дишин аьркинссарив ва ши­кку хьунадакьлакьисса диялдакъашивурттая ва ххуйшивурттая ихтилат бувуна 2-мур ЦIувкIуллал школалул директор Дауд ХIабибуллаевлул.
Багърал оьрчIру тарбия баврия гьарта-гьарзасса ихтилат бувуна Вихьуллал оьрчIал багърал каялувчи ХIусайнова Залиххал.Мукунма ххисса кIулшиву дулаврил иширттая ихтилат бувуна Хъусращиял музыкалул школалул директорнал ПатIимат Гаргацовал.
Ккуллал райондалул адлминистрациялул чулухасса грамотартту, Аьрасатнал КIулшиву дулаврил министерствалул чулухасса цIарду дуллушиврул приказру буллуна цаппара учительтурахьхьун. Конференциялия махъ най дия методикалул объединениярттал давурттивгу.