Июньдалул 3-нний Ккуллал райондалийн даврил аьрххилий увкIунни Аьрасатнал Федерациялул ПаччахIлугърал Думалул депутат Артем Бичаев. Райондалул администрациялул къатраву ванащал агьалий кьамул бунни республикалийсса Жяматийсса халкьуннал фронтрал каялувчи Жамалуттин Шагьабуттиновлул.
Депутатнал цIухху-бусу бунни райондалул жяматрал багьу-бизулия. Къулагъасрайн лавсунни райондалийн газ буцаврил, машинарттал ххуллурду, ламурду бакьин баврил масъалартту. Депутатнал бувсунни парламентравусса цала даврия, кIицI лавгунни хасъсса аьралий операциялул гьурттучитурал ва миннал ниттихъал, кулпатирттал чIарав ацIан хIадурну ушиву.
Зунттал щархъавунсса аьрххилул лагрулий Артем Бичаев хьунаавкьунни хасъсса аьралий операциялий жанну дуллусса аьралийтурал ниттихъащал ва кулпатирттащал.
Гьарица сукку бувсса масъалалул хIакъираву депутатнал бунни хасъсса маслихIатру, бувсунни ми дузал баврил ялув ацIантIишиву.
Дуккаврил аралуву хьхьичIуннайшивуртту хьун дурсса учительтуран буллунни Барчаллагьрал чагъарду.
Аьрххилул лагрулий Артем Бичаев бакIчисса делегация бивунни Ваччиял шяравусса оьрчIал багъравун. Депутатнал пиш-каш дунни оьрчIру итххяххан байсса игрушкартту ва спортрал кьай-кьуй.
Ккуллал райондалул бакIчинал хъиривчу Ажуб ХIусмановлул барчаллагь увкунни райондалул жяматрахь хъуннасса къулагъас дурсса Артем Бичаевлухь.
Имара Саидова
