Июньдалул 12-нний жулва билаятрай кIицI лагай Аьрасатнал Кьини – чIяву миллатирттал халкьуннал цашиврул, жула бюхттулсса державалул лавгмунил ва бучIантIимунил цIакьсса ламуну хъанахъисса байран. Ва кьини, щалвагу билаятрай кунна, Лакрал райондалийгу хьунни личIи-личIисса шадлугъру.

Гъази-Гъумук ОьрчIал искусствардал школалул хьхьичIсса майданнив хьунни «Аьрасат – ттул Ватан!» тIисса цIанилусса шадлугъ. Майдан цуппагу чIюлу бувну бия байрандалун хасну, ттугъругу лавчIун.
Шадлугъ дайдирхьуна Буттал кIанттул цIанийсса Хъунмасса дяъвилий ливтIуминнан дацIан дурсса гьайкалдануцI тIутIив дишаврийну. Хъирив Аьрасатнал Федерациялул гимнрахун СВО-лул гьурттучи Хайруттин Гъазиевлущал гьаз бувна паччахIлугърал ттугъ.
Гъази-Гъумучиял ОьрчIал искусствардал школалул тарбиялувтурал бавтIминнайх дарчIуна Аьрасатнал ттугълил лиссурду (лентарду).
Гихуннай байран лахъи ларгуна администрациялул актовый залдануву. Шикку ва Кьинилун хас бувсса махъру лавхъуна райондалул администрациялул бакIчинал хъиривчу Явсупи ХIамзаевлул, райондалул прокурорнал хъиривчув Хизри НурбахIандовлул, Гъази-Гъумучиял шяраваллил администрациялул бакIчи Мурад АьбдурахIимовлул, полициялул отделданул ­начальник МахIаммад Рамазановлул, ­райондалул «Ххяххабаргъ» кказитрал хъунама редактор ­Мусалав Мусалаевлул ва м.ц. Ва шадлугърай паспортру ­буллунни балугъравун бивсса ­дуклаки оьрчIан.
Ахирданий Культуралул центрданул зузалтрал ва ОьрчIал искусствардал школалул ­тарбиялувтурал ­ккаккан дунни ­концерт.
* * *
Гъази-Гъумучиял оьрчIал библиотекалийгу, райондалул вайми шяраваллал библиотекарттайгу хьунни Аьрасатнал Кьинилун хас дурсса шадлугъру, лу­ттирдал «Ттул гимн, ттул ттугъ, ттул Аьрасат!» цIанилусса выставкарду. Хьунни «Аьрасатнал ЧIавахьулттив» акциялул журалийсса, махъа нанисса никираву Ватандалухсса ччаврил гьану бизаврил ххуллийсса цайми давурттугу.
ЧIарттал шяраваллил библиотекалул ва школалул цачIу дунни «Аьрасат, хьхьичIунмай!» цIанилусса флешмоб, шикку ихтилатру хьунни жула паччахIлугърал тарихрайн, символлайн (ттугъ, герб, гимн) багьайсса. ХIадур дурну дия лу­ттирдал «Россия все мы: и ты, и я» цIанилусса выставкагу.
КIундиннал шяраваллил библиотекалул хIадур дурну дия «Ттун ххирар Аьрасат» тIисса цIанилусса выставка ва «Аьрасатнал ЧIавахьулттив» акция.
Мукунна Хьурттал, ШавкIуллал ва цаймигу шяраваллавугу хьунни ва Кьинилун цIа кусса мероприятияртту.

Бадрижамал Аьлиева