Лакрал райондалий хъуннасса шадлугърай кIицI ларгунни Аьрасатнал кьини.
Ва дайдирхьунни Аьрасатнал Ттугълил лишанну хъанахъисса лентарду шадлугърайн бувкIминнайх бачIаврия. Яла Аьрасатнал гимнрахун райондалул бакIчи Зураб Куччаевлул ва хасъсса аьралий операциялул гьурттучи, Чувшиврул ордендалул кавалер МахIаммад Аьлиевлул гьаз бунни Билаятрал ттугъ.
Райондалул бакIчинал хъиривчу Малик ХIусмановлул бувсунни, щала билаятрай кунна, райондалийгу кIира кьини дикIан тIий душиву паччахIлугърал яла агьаммур байрандалун хас дурсса мероприятияртту.
Муния махъ, байрандалул шадлугърайн бавтIми барча бунни Зураб Куччаевлул:
– Ххирасса агьалий, хIакьину жува кIицI лаглай буру жува цачIун буллалисса байран – Аьрасатнал кьини. Ва авадансса тарих, цIанихсса аьдатру дусса жула бюхттулсса билаятрая пахрулул дурцIусса кьинир.
Аьрасат – жула ппухълур, жула ххувшавурттур, жула культурар. ХIакьину жунма хаснува дакIний бикIан аьркинссар Аьрасатнал кьуват халкьуннал цачIушивруву бушиву. ТачIав рукъацаннав жула билаятрай ялапар хъанахъисса чIяву миллатирттал дянивсса нахIу-хIалимшиву, личIаннав жула агьали куннан кув бувчIлай. Жула ватан тIурча, цIакь хьуннав шиная шинайн!
Аьрасатнал Кьини гьарца шинал щала билаятрай шайссар «Мы — граждане России!» тIисса акция. Ванил лагрулий ва зуруй оьрмулул ацIния мукьра шин бартларгсса оьрчIан булайссар бакIрал чагъарду. Ва кьини райондалул бакIчинал канива бакIрал чагъарду лавсунни Ажа Катаевал, ХIажи ХIажидаудовлул ва Диана Аьлишаевал.
Шадлугъ къуртал хьунни райондалул магьирлугърал зузалтрал Гъумучиял оьрчIал магьирлугърал школалул тарбиялувтуращал цачIу хIадур дурсса концертрал программалийну.
Зулайхат Тахакьаева
