ХIакьину, билаятрай захIматсса тагьар дусса ппурттуву, аьлтту хъанай бур унгу-унгусса патриотътал. Жула инсантал ка-кумаг бан хIадурсса бушиву цимилгу исват хьунни Украиннал аьрщарай нанисса хасъсса аьралий операциялуву гьуртту хъанахъисса аьралитуран буллалисса ихIсандалул кумаграйну. Дазу-зума дакъасса дур халкьуннал дакIурдил сахаватлувшиву ва чумартсса тIуллу.
Украиннал аьрщарай хасъсса аьралий операция байбивхьуния шинай, аьралитуран кумаг буллай, чIарав ацIлай ур МахIачкъала шагьрулул 49-мур школалул директор Аьбдулкарим Айгунов.
Вай гьантрай Аьбдулкарим увкIунни хасъсса аьралий операциялий гьуртту хъанахъисса аьралитуран гуманитар кумаг ва дуклаки оьрчIал чулухасса ссайгъатру биян бувну. Ва ххуллухсса цала чулухасса кумаг бунни Луганскаллал Халкьуннал Республикалий, Курский ва Белгородский областирдай аьралий буржру бартбигьлагьисса «Каспий» тIисса Дагъусттаннал цалчинсса добровольчествалул батальондалун.
Аьралитурал ххарину хьунаавкьунни ччя-ччяни гуманитар кумаг лавсун учIайсса Аьбдулкарим Айгунов. Ванал аьралитурачIан диян дунни захIматсса шартIирдаву аьркин дагьайсса кьай-кьуй: медикаментру, дуки-хIачIия, чани бан ишла дайсса оборудование, сувенирду ва дуклаки оьрчIал чивчусса чагъарду.
Аьбдулкаримлул «Каспий» батальондалул командир, полковник Табир Маликовлун лавайсса даражалий аьралий буржру бартбигьаврихлу Барчаллагьрал чагъар буллунни.
Аьралитурал бувккунни МахIачкъала шагьрулул 49-мур школалул 3-мур классрал дуклаки оьрчIал чивчусса, асар хьунсса чагъарду.
Командирнал барчаллагь увкунни аьралитураха аякьалийсса Аьбдулкаримлухь ва ванал гьалмахтурахь.
Аьбдулкарим Айгуновлул ва ванал гьалмахчу МахIаммад Халидовлул хасъсса аьралий операция наниссаксса хIаллай цимилагу тIайла бувккун бур аьралитурансса кумаг.
ХIакьинусса кьини Аьбдулкарим ва ванал гьалмахтал кунмасса, чумартсса инсантурал дуллалисса давурттан багьа бакъассар. Укунсса вирттал жула аьралитурал махъ буссаксса, ххувшаву ласунсса вихшалагу ххишала хъанай дур.
Имара Саидова
