ЦIуссалакрал райондалийсса Чапаево шяравасса, АьФ-лул Думалул депутатнал кумагчи, Рамазан Хайдакьов лавгунни Курскаллал областьрайсса «Ветеран» тIисса штурмовой бригадалун гуманитар кумаг биян буван. Шикку ва хьунаавкьунни Ватандалул мурадру буручлачисса аьралийтуращал, цIухху-бусу бунни вайннан ци аьркинну дуссарив, ссах мюхтажну буссарив.

Рамазан аьралийтурачIан лавсун лавгун ур беспилотникру.
Аьралийтурал дакIнийхтуну барчаллагь увкунни цахара дуллалисса аякьалухлу ва кIицI лавгунни, укунсса давурттал, ххувшаву гъан дуллай, хьхьичIунмай бачинсса гьавас бутлатишиву.
Рамазан Хайдакьов хасъсса аьралий операциялул гьурттучитуран чялишну кумаг буллалиминнавасса ца хъанай ур. Ва цимилагу гуманитар кумаг биян бан лавгун ур СВО-лийн ва госпитальлай хъин хъанахъисса аьралийтурачIан.