Вай гьантрай «Дагестан» РИА-лий хьунни Дагъусттаннал аьралий комиссар полковник АьбдурахIман Мурадхановлул интнил призыврал хIакъиравусса брифинг.
2025 шин Аьрасатнал президентнал Ватан дуруччул шинну баян бунни. Мунилгу хъиннура исват буллай бур хIакьинусса кьини аьралуннаву къуллугъ баврил ва жагьилтал Ватан ххирану тарбия баврил агьамшиву.
Байбихьулий аьралий комиссарнал ларгсса шинал ссуттилсса призыврал хIасиллу дунни, кIицI лавгунни Аьрасатнал президентнал ккаккан дурсса план щаллу дуршиву. Ссутилсса призыврал кампаниялул лагрулий Дагъусттанная аьралуннаву къуллугъ бан увцуну ур 3400 инсан.
Ванал кIицI лавгунни призыв лавайсса даражалий щаллу дурсса шагьрурду ва районну. Бувсунни жагьилтал аьралий частирдавун биян бан Ярагъуннил гужирдал авиациялул 10 рейс дуршиву, цинявппагу призывниктал ххуллийх дуканмунил дузал бувшиву. Ххуллу шанма гьантлияр ххишаласса бухьурча, призывниктал вагон-рестораннаву шаннагу чIумух дукан буллай бивкIшиву. Самолетирттай ва пассажиртурал поездирттай къуллугъ буллансса кIанттурдайн иян увну ур 3300 призывник.
ЦIана нанисса призыврая буслай, аьралий комиссарнал кIицI лавгунни ва призывравун 1995-2007 шиннардий бувсса оьрчIру багьлагьишиву.
Инттусса призыв най дикIантIиссар апрель зурул 1-нния июль зурул 15-ннийн дияннин. Военкомнал бусласимунийн бувну, апрель-июль зурдардий Дагъусттанная аьралуннаву къуллугъ бан буцинтIий бур 3700-нния ливчусса жагьилтал.
АьбдурахIман Мурадхановлул кIицI лавгунни сборный ва призыврал пунктирдай интнил призыврайн хIадурну бушиву, сборный пунктрая цалчинсса призывниктал тIайла буклантIишиву апрель зурул 10-нния байбивхьуну, жагьилтал аьралуннаву хьхьичIва кунма 12 зуруйсса къуллугъ буллантIишиву.
Аьралий комиссарнал мукунма бувсунни къуллугъ булланми цукун язи бугьлантIиссарив.
– Цалчинна-цалчин призыврал комиссиялул хIисавравун ласунтIиссар аьралуннавусса аьркиншинна. Яла – призывникнал цIуллу-сагъшиврул тагьар, кIулшивурттал даража, аьралий пишардал чулухасса хIадуршинна. Гьарица журалул аьралуннаву, цала щаллу буллалисса бигардах бурувгун, личIи-личIисса тIалавшиннарду дуссар,– увкунни АьбдурахIман Мурадхановлул.
Ванал бувчIин баву дунни Аьрасатнал цIусса регионнай къуллугъ баврил хIакъиравугу. Призыврайн бувну, аьралуннаву къуллугъ буллалими Донецкаллал ва Луганскаллал Халкьуннал Республикарттайн, Херсоннал ва Запорожскаллал областирдайн хасъсса аьралий операциялул мурадру бартбигьлан къагьанбантIиссар. Къуллугъ баврил чIун къуртал шайхту, циняв призывниктал шаппай итабакьинтIиссар.
Призыврал ва аьралуннаву къуллугъ баврил хIакъираву призывниктураща ва миннал нитти-буттаща кIул бан бюхъантIиссар Аьрасатнал Обороналул министерствалул официал порталданий, «Призывникам» тIисса разделдануву. Му бакъассагу, Обороналул министерствалул телефон зунтIиссар апрель зурул 10-нния тихуннай.
Телефондалувухсса оьвчавурттан жавабру дуллантIиссар тталат ва хамискьинирдай ссят 10-нния 12-ннийн бияннин.
Оьвчин бюхъайссар вай телефоннайн: 8(495) 498-96-96, 8(495) 498-96-97, 8(495) 498-96-98.
Дагъусттаннал аьралий комиссариатрал «ТIайланнасса линия» зунтIиссар, апрель зурул 8-нния байбивхьуну, гьарица кьини. Телефонну: 8-872-263-88-86, 8-872-268-16-07.
Андриана Аьбдуллаева
