Ккуллал райондалул администрациялий ччя-ччяни шай, кутIасса отпускгу лавсун, буттал шяравун биян бувкIсса СВО-лул гьурттучитуращалсса хьунабакьавуртту.

Ва ххуллухь администрациялул вакилтал хьунабавкьунни Цалчинмур ЦIувкIратусса ХIусайннул ва ХIабибатлул арс АьбдурахIман ХIажиевлущал. Хьунабакьаврий гьуртту хьунни райондалул бакIчинал хъиривчу Юсуп Исякьов ва Цалчинмур ЦIувкIуллал шяраваллил хъунама МахIаммадрасул Илдаров.

Цаппара хIаллай шавай игьалаган увкIсса АьбдурахIман ­аьраличу ур, СВО-лийгу уссар, му байбишайхтува. Ва лайкь хьусса наградарттавух дур медаль «За отвагу», Аьралий ордендалул лишан , 4-мур даражалул «Георгиевский крест».
Юсуп Исякьовлул цала мукъуву кIицI бунни райондалул хъуниминнал чулуха мудангу дагьайкунсса къулагъас душиву СВО-лий гьуртту хьуминнал ва миннал кулпатирттал масъаларттах. Бувсунни чIун-чIумуй бияйшиву СВО-лул гьурттучитурал ужагъирттайнгу, миннал тIалавшиндарал хъирив лавну, аьркинмур дузал дан­сса хIарачатгу бувайшиву. Барчаллагь увкунни билаятрал мурадру буручлачисса чувшиврухлу АьбдурахIманнухьгу, ванащал бувкIсса хъамаллурахьгу.

АьбдурахIманнулгу бувсунни райондалул администрациялий цува цалчин акъашиву, СВО-лул иширттаву райондалул каялувчитурал ва агьалинал бутIагу бушиву. КIицI лавгунни цахра аякьа душиву мудангу асар шайшиву, хаснува посылкарду дуркIсса чIумал.
«Инсантал посылкарду тIайла дуклай бур жучIан, ватандалиясса ссалам-ссайгъатну. Жул дакIру ххари шай мукунни. Умудрай ура, уттиния тинмайгу райондалул хъуниминнал СВО-лул гьурттучитурал ва миннал кулпатирттал масъаларттах къулагъас хIура дуккан къаританссар тIий. Аьралитал багьайсса куццуйсса чIаравбацIаву дикIантIишиврий дакI дарцIуну бухьурча, кьянкьану бавцIуну талансса гъирагу ххи буллалиссар», – увкунни ванал.

ПатIимат Рамазанова