Сентябрь зурул 3-нний Аьрасатнаву кIицI лагай терроризмалийн къарши буккаврин хас дурсса кьини.
Къуллугърал бурж биттур буллай жан дуллусса полициялул капитан Сиражуттин Аьлиевлул цIанийсса МахIачкъала шагьрулул 33-мур гимназиялий дуккаврил шинал дайдихьулий аьдатравун дагьну дур оьрчIру терроризмалия буруччаву мурадрайсса мероприятие дуллалаву. Му кьини дуллалисса мероприятие дайдишай цала выпускник Сиражуттин Аьлиев дакIнийн утаврийну.
Ва ххуллухсса батIаврий гьуртту хьун бувкIун бия Артем Боровиклул цIанийсса «Честь. Мужество. Мастерство» тIисса дунияллул халкьуннал премиялул кIийла лауреат хьусса, ДР-лул ПаччахIлугърал премиялул лауреат Алик АьбдулхIамидов, Дагъусттаннал халкьуннал художник, ДР-лул ПаччахIлугърал премиялул лауреат, скульптор МахIаммад-Аьли МахIаммадов, ДР-лул Халкьуннал Мажлисрал депутат ОьмархIажи Аьлиев, Халкьуннал ополчениялул председатель МутIаллим МутIаллимов, Росгвардиялул ветерантурал советрал председатель Зайнуттин Исяев, «Дагестанская жизнь» кказитрал хъунама редакторнал хъиривчу ХIажи Мирзаев, Сиражуттин Аьлиевлул уссу Юрий, ссу Татьяна ва мачча-гъанми.
Дайдихьулул ихтилат бувна гимназиялул директор Байтуллагь Жамаловлул. ОьрчIахь цIусса дуккаврил шин барча дурну махъ, ванал кIицI лавгна сентябрь зурул 3-нний Бесланнай хьусса трагедиялул пашмансса лахIзарду, дуруна минутрайсса пахъ багьаву.
– Пахрулий буссару жула гимназиялун къучагъсса полициялул капитан Шихамирдул арс Аьлиев Сиражуттиннул цIа дулаврия. Жу хIарачат банну Чувшиврул ордендалун кIийла лайкь хьусса жула выпускникнал цIанийсса гимназиялуву дуклакисса оьрчIру ванаха лавхьхьуну тарбия бан. Дуклаки оьрчIан ва мудангу эбратну икIантIиссар, – увкуна Байтуллагь Жамаловлул.
Дагъусттаннай ва Чачаннаву хьусса аьрали иширттая журналист Алик АьбдулхIамидовлул бувсуна, республикалийн кьини дурксса яла захIматмур чIумал цалчинсса кьюкьравух боевиктурая Ватан дуручлай бивкIминнавух Сиражуттингу ивкIшиву.
– На мудангу тикрал буллан икIара, цайминнал оьрмурду ххассал баврил цIаний жан дуллусса жагьилтал цинявппагу виртталли тIий, мукунсса ия вас-ццах бакъа боевиктуращал талай ивкIсса Сиражуттин Аьлиевгу, – увкуна ванал.
Ихтилатру бувминнал кIицI лавгуна Сиражуттин Аьлиев кунма къучагъсса вирттаврал ккаккан бувшиву цивппа Ватандалийн дакI тIайласса, унгу-унгусса патриотътал бушиву. Бувсуна оьрчIахь террорданул биян буллалисса оьсса баларттая ва миннуя бурувччуну бикIансса маслихIатирттая.
ОьрчIал дурккуна виричунан хас дурсса назмурду. Ихтилатирттая махъ жанах1равусса Сиражуттин Аьлиевлул чарвитул бюстрачIа дирхьуна тIутIив ва хъамаллуращал рирщуна дакIний личIансса суратру.
Ахирданий Сиражуттиннул ссил Татьянал дакIнийхтуну барчаллагь увкуна уссил аьпа абад бан бувкIминнахь.
МахIачкъала шагьрулул 33-мур гимназиялул жанахIраву виричунан бюст бувну бур гьунар бусса скульптор МахIаммад-Аьли Аьлиевлул.
Сиражуттин увну ур 1961 шинал МахIачкъалалив. Ванал ппу Шихамир ур Читтурдал шяравасса, нину Валентина оьрус миллатраясса.
1978 шинал 33-мур гимназиягу къуртал бувну, Сиражуттин дуклан увххун ур ДГПУ-лул физкультуралул факультетрайн. Дуклай унува хьуну ур Аьрасатнал дзюдорал спортрал мастер. Дуккавривугу, спортравугу хъинну итххявхсса жагьил ивкIун ур. Институт къуртал бувну махъ лавгун ур аьралуннаву къуллугъ бан.
1993 шинал зун ивкIун ур ОМОН-далий, дайдихьулий взводрал командирну, милицанал капитаннал чин ларсун махъ ивтун ур батальондалул командирну. Сиражуттиннун цалчинсса Чувшиврул орден дуллуну дур 1996 шинал Къизлардал шагьрулий ва Первомайскалий хьусса къачагътурал кьюкьри духлаган дуллалисса дяъвилул иширттаву дурсса къучагъшиврухлу.
1999 шинал Буйнакскаллал райондалийсса Къарамащилив ва Чабанмащилив хьусса контртеррорданул операциярттаву аьрали буржру лавайсса даражалий биттур баврихлу, Сиражуттин Аьлиев (ивкIуну махъ) лайкь хьуну ур кIилчинмур Чувшиврул ордендалун.
Имара Саидова
Виричунал оьрму бяливчIун бур оьрмулул 38 шинаву.
1999 шинал август зурул 28-29-нний гьанттайн чIумал, Буйнакскаллал райондалий най бивкIссар боевиктал бат буллалисса операция. Хьхьувай, сентябрь зурул 3-нний, капитан Сиражуттиннул каялувшиву дуллалисса ОМОН-далул зузалт бувххун бивкIссар боевиктал лабивкIсса Чабанмащиял шяравун. Дяшяраву вай биривну бур боевиктурал биту-ххитулухьхьун. Цайнна кIусса щаву дирну дунугу, Сиражуттиннул, зузалтрайн талансса амрурдугу буллай, 40-хъул боевик кьатI увну ур. Капитан Аьлиев, цавура рухI дуссаксса, жандалий хIайп къакуну, талай ивкIун ур. Тай гьантрай террористътурал лавмартсса каруннаща ивкIуссар ОМОН-далул 13 зузала.
