Итникьини Лакрал райондалул администрациялий хьунни СВО-лул цалчинсса ­Аьрасатнал Виричу НурмахIаммад ХIажимахIаммадовлул нину Сапижат Мазаевал ва ДР-лул Халкьуннал Мажлисрал депутат Марат Илиясовлул агьалинащалсса хьунабакьаву.

Ваний гьуртту хьунни райондалул бакIчи Зураб Куччаев, идарарттал каялувчитал, шяраваллал бакIчитал ва депутатътал.
Зураб Куччаевлул кIицI лавгунни Сапижат Мазаева хьуннав, Марат Илиясов хьуннав, даин райондалул иширттавух гьурттусса хIакьсса патриотътал бушиву ва мунихлуну барчаллагь увкунни.
Вай агьалинащал хьунабакьин бучIаврил исват буллай бур хасъсса аьралий операциялий ватандалул ххуллий жанну дуллуминнал ва хIакьинугу паччахIлугърал мурадру буруччаврил цIаний жард къакуну бурж биттур буллалиминнал кулпатирттал буруккинттахсса къулагъас билаятрал хьхьичIххуттай душиву ва хъирив нанисса ник тарбия давриву тарихрал аьпа буруччаврил агьамшиву.
Цила оьрмулул ххуллия буслай, Сапижат Мазаевал чIурчIаву дурунни цуппа шяраву хIакьсса захIматкашнал кулпатраву хъунма хьусса, зунттавусса кьянатшиву ккарксса инсан бушиврий ва захIматрал кьадру цичIава бюхттулсса кIанттай бушиврий. Цищава шайссаксса къулагъас дуллансса пикрилий бушиву Лакку кIанттул мурадирттах. Лакрал ва Ккуллал районнал агьалинал яла цIурювкьумур суал – газ буцаврил ялув бувсунни, цIана паччахIлугърайсса тагьарданух бурувгун, цаппарасса кIанттурдайн газ буцинсса проектру махъун руртун духьурчагу, цищава бювхъушиву жуллами районну программалуву личIан дан.
Марат Илиясовлул кIицI лавгунни, депутатнал къуллугърай унугу, акъанугу цува даин райондалул ва миллатрал чIарав ушиву ва даингу икIантIишиву, мукун тарбия увну ушиву.
Райондалул депутатътурал мажлисрал хъунама Явсупи ХIамзаевлул ва Гъумучиял шяраваллил бакIчи Мурад АьбдурахIимовлул, хъамаллурахь барчаллагьгу куну, кIицI лавгунни агьалинал хIал-ахIвалданийн багьайсса агьамсса масъалартту, хаснура къулагъас дурунни тIабиаьтрал апатIрайну зараллу бивсса ххуллурдах ва щинах.
Муса Маннаровлул цIанийсса Гъумучиял школалул директор Соня Макьаевал сукку бунни ниттил маз лахьхьаврийн ва буруччаврийн багьайсса суал.
Арулла шяраваллил оьрчIру заназисса Хъунайннал школалул директор МахIаммад Хъунбуттаевлул мурад бия тIабиаьтрал апатIрайну зараллу бивсса ххуллурдайх, транспортгу зия хьуну дуну, оьрчIру дарсирдайн гьан-бучIан къахъанай ливчIун бушиву.
Хъамаллурал махъ буллунни кIицI лавгсса масъаларттах къулагъас дуван, ми щаллу бансса чаранну лякъин.
Зураб Куччаевлул барчаллагь увкунни хъамаллурахьгу, хьунабакьаврийн бувкIминнахьгу.
Хъиривми гьантрай Марат Илиясов хьунавкьунни цайми щархъал агьалинащалгу, вичIи дирхьунни минналми мурадирттахгу.