Дагъусттаннал Капитал ремонтрал фондрал хъунаманал хъиривчу Заур Бахмудовлул кIантту-кIанттурдайн лавгун кьамул бунни агьали.
Къизлардай коммунал масъаларттал хIакъираву къуллугъчинащал хьунабакьин бувкIун бия 40 шин Дагъусттаннан тIисса кIичIиравусса 18-мур, Октябрьская кIичIиравусса 2-мур, ХIажиевлул цIанийсса кIичIиравусса 1 а, МахIачкъалаллал кIичIиравусса 6-мур, Набережная кIичIиравусса 42/1 ва 1а къатраву ялапар хъанахъими.
ЧIявуми бувкIун бия къатрал магъив цIу дуккан даврил, дакьин даврил хIакъираву. Бия щинал система дух хьуну душиврия аьрзирайссагу. Вай цинявннал суаллахьхьун балжисса жавабругу дуллуну, бувчIинбавурттугу дунни.
Хьунабакьаврий Заур Бахмудовлул, ТСЖ-лул ва УК-лул каялувчитурал ххал бивгьунни къатрал мониторинграл файллу сакин даврил, взносру къадуллай хьусса буржирдал, капитал ремонт дан къатри хIадур даврил ва миву ялапар хъанахъиминнан баян баврил масъалартту.
Къизлардайсса къатри 60 шинал хьхьичI, мунияргума ччяни дурсса дур. 2015-2024-ку шиннардийсса Региондалул программа дузал даврил лагрулий гьануцIакул бакьин бувну бур чIявусса квартирарду бусса 44 къатта. 2025-ку шинал мукунма бакьин бантIий бур 174 инсан ялапар хъанахъисса 8 къатта. Ци чулийгу капремонтрахсса взносирттал бурж Къизлардай 116 миллиондалия ливчусса бур. Взносру дулаву 52%-раяр ххишала хъанай дакъар. Росреестрданий бакъар 269 квартиралул заллухъруннаясса сведения. Миннул бурж 8 миллиондалия ливчусса бур.
Южно-Сухокумскалий цала масъаларттащал увкIунни 4 инсан. Вайннал аьрзарду бия лувчIиннив щин дацIлацIаврия, тIааьн дакъасса кьанкь най душиврия, мукунма подъездирттавусса хъатрурдая ва мичIакирттая.
Заур Бахмудовлул бувсунни 2025-ку шиналсса кутIасса чIумул пландалийн бувну вай къатраву щинал система дакьин дан дакIний бушиву.
Мероприятие къуртал хьуну махъ цинявннан буллунни аьркинсса информациялущалсса буклетру, бувчIин бунни капремонтрахсса взносру чIумуй дулун аьркиншиву.
Андриана Аьбдуллаева
