Вай гьантрай МахIачкъалалив хьунни «Справедливая Россия – За Правду» партиялул ирглийсса пресс-конференция. Ва хас дурну дия дукиялул багьри ва ЖКХ-лул тарифру лахъ шаврил масъаларттан.
Ваний гьуртту хьунни Дагъусттаннал региондалийсса «Справедливая Россия – За Правду» партиялул отделениялул советрал председатель, ДР-лул Халкьуннал Мажлисрал председательнал хъиривчу Камил Давдиев, ДР-лул Халкьуннал Мажлисрал Культуралул, жагьилтурал иширттал, спортрал ва туризмалул комитетрал председатель Мурат Пайзуллаев, МахIачкъала шагьрулул Ленинский райондалул Мажлисрал депутат НурмахIаммад ХIабибуллаев, «Справедливая Россия – За Правду» партиялул член Щамхал Сулайманов.
Камил Давдиевлул кIицI лавгунни инсантурал оьрмулул шартIру къулай даву партиялул хьхьичI бивхьусса агьамсса масъаларттавасса цану хъанахъишиву.
Бувсунни дукиялул багьри ва ЖКХ-лул тарифру гьаз шаврийну инсантурал ахIвал-хIал кIюла хъанахъишиву. Хаснува пенсионертуран ва чIявусса оьрчIру бусса кулпатирттан ялапар хьун захIматну бушиву.
Вай иширттацIун бавхIуну, партиялул вакилтурал хъирив лавну ххал диргьуну дур инсантурал багьу-бизу гьаз бансса экономикалул шартIру.
– ЦIанасса ппурттуву анаварсса бущилий гьаз хьуну най бур дукия-хIачIиялул, ЖКХ-лул тарифирттал, къатта-къушлил, интернетрал, мобил связьрал ва цаймигу кьай-кьуйлул багьри. Укунсса ишру хьхьичIва-хьхьичI асар хъанай бур ахIвал кIюласса кулпатирттан, пенсионертуран, студентътуран. КIицI лавгсса масъалартту хъар хъанай бур экономикалул багьу-бизулийн. Инсантурал доходру инфляциялул бущилул хъирив лаллай дакъар. Агьалинал оьрмулул шартIру ххуй даву мурадрай «СРЗП» партиялул ХIукуматрал хьхьичIун ларсъссар кIицI ларгсса сиптарду, – увкунни Камил Давдиевлул.
Пенсионертуран, дуклаки оьрчIан, аьралийтуран ва ахIвал кIюласса кулпатирттан мюнпат бусса социал тариф личIи даврин, ЖКХ-лунсса субсидияртту булаврин ва цаймигу къулайшиннарду кIицI лагаврин хас бувсса ихтилат бунни Мурат Пайзуллаевлул.
– НукIува увкусса куццуй, партиялул агьаммур мурад агьалинал оьрму бигьа-рахIат бавур. Жул сипталийн бувну сукку бувну буссар агьалинал налогру харжираха лархьхьуну дулаврил масъала. КъатIайлассар хъуннасса доход дусса инсанналгу, чIивисса харж буманалгу цара-ца налог дуллалаву.
Укунсса иширттал хIакъираву, тIайламур бацIан бан хIарачат буллай, жу Аьрасатнал президентнайн буккару, – увкунни Мурат Пайзуллаевлул.
Ахирданий Камил Давдиевлул ва партиялул вакилтурал журналистътурал суаллахьхьун жавабру дуллунни.
Имара Саидова
