Вай гьантрай Ростов-на-Дону шагьрулийсса Технический университетрал спорткомплексраву хьунни Дагъусттаннал лайкь хьусса учитель Ризауттиннул арс МахIаммад Айгуновлул аьпалун хас дурсса турнир.

Буттал цIа абад даву мурадрай дуллалисса турнир, цIанихсса чемпионтурайнгу, бусравсса хъамаллурайнгу оьвкуну, лавайсса даражалий тIайла дурккунни Дагъусттаннал Дзюдорал федерациялул вице-президент, МахIачкъала шагьрулул 49-мур школалул директор Аьбдулкарим Айгуновлул.
КIицI лаган, Аьбдулкаримлул каялувшиндаралу гьашину 12-нни дуллалисса цала бутал аьпалун хас дурсса турнир. Икьрал дурну дуссия гьашинусса турнир Луганскаллал Халкьуннал Республикалий дуван. Тикку нигьачIаву дусса тагьар баян баврийн бувну, спортсментал мюхчан баву мурадрай, Ростоврай дансса пикри хьуну бур. Турнирданий гьуртту хьунни 200-ннийн бивсса хьхьичIунсса спортсментал.

Спортрал программа хIадур дурну дия 60 метралийх ва 1 километралийх лечаврил, пут личаврил ва гьаз даврил, тIанкI учаврил ва цаймигу бяст-ччаллая.
КутIасса манзилданийх левчуну ххув хьунни ДГТУ-лул студент Жувенд Платель. Ххув хьуминнавух бия Ростовуллал областьраясса, Донецкаллал Халкьуннал Республикалиясса, Луганскаллал Халкьуннал Республикалиясса ва Дагъусттаннаясса, Гергебильлал ва Дахадаевуллал районнаясса спортсментал.

Вай бяст-ччаллаву цалчинсса кIанттурду бувгьусса спортсментуран кубокру, грамотартту дакъассагу, дуллунни бахшишру ва сувенирду. Турнирданийн бувкIсса бусравсса хъамаллурангу дуллунни МахIаммад Айгуновлул суратру дирхьусса медальлу ва дакIний личIансса бахшишру.
Турнирданул лагрулий Аьбдулкарим Айгуновлущал хьунаавкьунни Ростовуллал областьрал физкультуралул ва спортрал министр, Аьрасатнал лайкь хьусса тренер, СССР-данул спортрал мастер, отставкалийсса генерал-майор Обвинцев Алексей Анатольевич.

Имара Саидова