[dropcap]Л[/dropcap]акрал буккултран ххуйну кIулссар «ЧаннацIуку» кказитрал хъунама редактор, пагьму бусса чичу Къянчиев Абрик Ибрагьиннул арс.

[dropcap]А[/dropcap]брик увну ур 1947-ку шинал сентябрьданул 25-нний Ккуллал шяраву учительнал кулпатраву. Дуклай ивкIун ур Ккуллал ва ЧIяйннал школарттай. Аьпа бан, ванал буттал бусаврийн бувну, чIивини Абрик ивкIун ур личIлулсса, цанма къакIулмур, къабувчIлачIимур кIул бан ччи­сса, нитти-буттахьхьун хъуна инсаннал кунмасса суаллу буллалисса оьрчI. Ванан ххуйну дакIний лирчIун дур ЧIяйннал школалий дуклай ивкIсса шинну. ДакIний ливчIун ур гьарца цахьра дарс дихьлай ивкIсса учитель.
— Учительтурал чулуха ттун тIайлабацIу хьуссар, — тIий буслай ур Абрик. — Ттухьра дарс дирхьусса цинявппагу учительтал бия цала даврил хIакьсса ус­ттартал, цала оьрчIру кунма, дуклаки оьрчIругу ххирасса.
Гайннал цайнма биян був­сса асардая Абриклул чивчуссар «Зу муданмагу дакIний буссару» тIисса макьалагу. Му макьала дуркссар «Илчи» кказитрай, ЧIяйннал школалун 100 шин шаврил юбилей хьунадакьлакьисса чIумал. Мукунна му рирщуну дуссар школалун хас бувну итабавкьусса луттирайгу.
Школалияр махъ цаппара хIаллайсса (аьралуннаву къуллугъ буллан уциннин ва зана хьуну махъ) зий ивкIссар Гьарун Саэдовлул цIанийсса Ккуллал колхозраву. КIулшиву ларай дансса гъирарай, ванал заочнайну къуртал бувссар Москавуллал М.В. Ломоносовлул цIанийсса университетрал журналистикалул факультет. 1972-ку шиная айивхьуну, зий ивкIссар Ккуллал райондалул кказитрал корреспондентну. Мунищала архIал 5 шинай каялувшиву дурссар райондалул киносетьрайгу. 1987-ку шинай шихунай зий ур райондалул «ЧаннацIуку» кказит­рал хъунама редакторну. Ванал хъунмасса захIмат бишай, чIумул тIалавшиндарайнгу чул бивщуну, райондалийгу, респуб­ликалийгу, билаятрайгу хъанахъимур буккултрал хьхьичIун ласун, гай рязину личIансса мяъналул вибувцIусса кказитру итабакьлан.
Абриклун школалий дуклакинийва ххира хьуну дур художествалул литература. Ми асардал чичултрал ххуллийнгу кIункIу увну ур.
1974-ку шинал Абрик кьамул увссар СССР-данул Журналистурал союзрал членну. Ва жагьилнийва айивхьуссар оьрчIансса ва хъуниминнан хаварду, кьиссарду чичлай. Бувкссар дунияллийн оьрчIан хас бувсса «ЧIяйкъягъул багъ» ва «База ва Барзу» тIисса жужру. Вайннувасса хавардал жунма чIалачIи буллай бур Абрик цуксса оьрчIал багьу-бизу, тIул-тIабиаьт кIулсса чичу уссарив, цуксса мунан оьрчIру ххирассарив.
Ва хъанай ур лакрал чичулт­раву (бюхъай Дагъусттаннайгума) фантастикалул произведенияртту цалчин чивчусса авторнугу. Мугу гьарцаннаву чантI учайсса гьунар бакъар. Увкумунил барашиннану хъанай бур Къянчиев Абриклул итабавкьусса фантастикалул произведенияртту: «ХхурупIай марч», «Бяйкьусса аьрххи» (1990ш.), «Бургъил душ»(2000).
«Бургъил душ» тIисса кьи­ссалун лайкьсса кьимат бишлай, хъунмасса статья чивчу­ссар машгьурсса лакрал аьлимчу, филологиялул элмурдал доктор С.Х. АхIмадовлул.
АбрикI Къянчиевлул чивчусса произведениярттал маз бур пасихIсса, аьрки-аьркинний мазрал ярагъру ишла бувсса.
1996-ку шинал Абрик кьамул увссар Аьрасатнал Чичултрал союзрал членну.
Лакрал ва Дагъусттаннал литература хьхьичIуннай дан був­сса хъунмасса захIматрахлу ванан дуллуссар «Дагъусттан Республикалул культуралул лайкь хьусса зузала» тIисса бусравсса цIа, 2005-ку шинал лайкь хьу­ссар ДР-лул Госсоветрал грамоталун, 2009-ку шинал дуллуссар Аьрасатнал Федерациялул Культуралул министерствалул чулухасса ХIурматрал грамота, Аьра­сатнал Чичултрал союзралгу ванан дуллуссар А.П. Чеховлул цIанийсса дакIний личIансса медаль.
Сентябрьданул 25-нний Абрик ниттил увну хъанай дур 70 шин. Ва цIана ур оьрмулул ва творчествалул чагъирай.
ДакIнийхтуну юбилейгу барча дуллай, чIа тIий ура Абрик­лун цIакьсса цIуллушиву, давриву ва творчествалуву хьхьичIуннайшивуртту, дакI гьавасрал дурцIунна личIаву.
Ися МахIаммадов,
ш. Ваччи