Дагъусттаннал ХIукуматрал председатель Аьбдулмуслим Аьбдулмуслимовлул Ахъушиял райондалий дунни муниципалитетрал социал-экономикалул лябуккулул масъаларттал хIакъиравусса батIаву. Ваниннин премьер-министр ивунни муниципалитетрал цаппара социал объектирдайн.

Аьбдулмуслим Аьбдулмуслимовлул бусаврийну, Ахъушиял район хъанай дур шяраваллил хозяйствалул муниципалитет, шикку ласайсса дур ахънилссаннул ва нувщул чIярусса бакIлахъру.
Шяраваллил хозяйствалул лухччал аьмсса лагру дур 170 азарда гектар, миннува 13 азарда гектар дур хъуруннил, цIанасса ппурттуву ишла дуллай бур миннул 60 процент.
«Республикалул Шяраваллил хозяйствалул министерствалул информациялийн бувну, Ахъушиял райондалиясса цаягу ишбажаранчи – хъузала, багъманчи, ахъчи министерствалийн увкIун акъар паччахIлугърал чулухасса кумаг тIалав буван. Ттун ччай бур шиккува кIул буван, ссаву дуссарив мунил савав», – увкунни Аьбдулмуслимовлул.
ДР-лул ХIукуматрал председательнал тIимунийну, властьрал органнал цалчинми масъаларттуну хъанай бур зунттаву аьркинсса инфраструктура дузал даву. Вай дуван бюхъайсса давуртту дур.
БатIаврий махъру лавхъунни Дагъусттаннал экономикалул ва территориярттал лябуккулул министр ХIажи Султановлул, ДР-лул цIуллушиву дуруччаврил министр Ярослав Глазовлул, республикалул дуккаврил ва элмулул министрнал хъиривчу ХIажимурад МахIаммадовлул, ДР-лул шяраваллил хозяйствалул ва бакIлахърулул министрнал хъиривчу Зураб Куччаевлул, ДР-лул Культуралул ирс буруччаврил агентствалул каялувчи МахIач Мусаевлул.