ЦIуминалийсса Шушиннал школалий хьунни Аьрасатнал Виричу Дмитрий Серков увсса кьини мунал гьайкалдануцI тIутIив дихьлахьисса аьпалул мажлис.

ДакIнин бутанну, Шушиннал школа Дмитрий Серковлул цIанийсса бушиву ва школалул хIаятраву Виричунал цIа абад дуллалисса гьайкалгу душиву.
Вай гьантрай Дмитрий Серковлун хьунтIиссия 45 шин.
Виричу дакIнин утлати­сса мажлисрай гьуртту хьунни ЦIуссалакрал райондалул бакIчи МаматIи ХIамзатов, ванал хъиривчу Амир Султанов, райондалул бакIчинал кумагчи МахIач Акаев, ЦIуссалакрал райондалул КIулшиву дулаврил управлениялул хъунмур Светлана Къудаева, райондалул идарарттал каялувчитал, жяматийсса ишккаккулт ва дуклаки оьрчIру.
Аьпалул мажлисрай мукунма гьуртту хьунни ПаччахIлугърал Думалул депутат, Аьрасатнал Виричу НурмахIаммад ХIажимахIаммадовлул нину Сапижат Мазаева, ДР-лул Халкьуннал Мажлисрал депутат Артур Исрапилов.
Аьпалул мажлиcрай асар хьунсса ихтилатгу бувна Сапижатлул. Дуклаки оьрчIащалсса ихтилатраву ванил кIицI лавгуна ялун нанисса никирал жула тарих буруччин ва Ватандалул цIаний жанну дуллуминнал къучагъшиву дакIний ритан аьркиншиву, хIакьинусса жагьилтуран эбратну дикIан аьркиншиву буттахъал чувшиву, миннал кIунттихь бушиву Дагъусттанналгу, Аьрасатналгу бучIантIимур.
Школалул директор Шакират Абакаровал дакIнин бивчуна 1999-ку шиналсса дяъвилул ишру, бувсуна та ппурттуву Ватан дуручлай ивкIсса Аьрасатнал Виричу Дмитрий Cерковлул ва дагъусттанлувтурал дурсса чувшивурттая.
Светлана Къудаевал Шакират Шарапуттиновахь ва ванил коллективрахь барчаллагь увкуна оьрчIру Ватан ххирану тарбия баву мурадрай дуллалисса хъуннасса даврихлу. Ихтилатру къуртал хьуну махъ цинявппа лавгуна школалул хIаятраву дацIан дурсса Дмитрий Серковлул гьайкалдануцI тIутIив дишин.