Гьашину Дагъусттаннай бюхттулну кIицI ларгунни жула аьрщарайн ххявхсса дунияллул террористътал ххит бувну 20 шин бартлаглагисса юбилей.
Цинявннан ххуйну дакIнийссар жула халкьуннайх кьини дурксса тай дяъвилул гьантри. Тай иширттаву Дагъусттаннал халкьуннал ккаккан дурссия хIат-хIисав дакъасса чувшиву, цашиву, кувннал кув бугьаву. Цила бикIайкунсса дяъви най бивкIссар тай сентябрь зурул гьантрай ЦIуссалакрал райондалийгу. Яла чIявусса ливтIуссагу, бивщусса тиккур хьусса.
ЦIуссалаккуйн ххявхми ххит бувну 20 шин
ЦIуссалакрал райотделданул 32 милицанал зузалал, Аьрасатнал аьралитурал, ополчентурал ва укунмасса халкьуннал жанну дуллуссар, Ватан чапхунчитурая дуручлай. Укунмагу чIявусса бакIрачIан бувкIсса ЦIуссалакрал агьулданун тай кьинирдугу лахъансса бувкссар.
Сентябрь зурул 14-нний райондалий хьунни тай иширттаву жанну дуллуми дакIнийн бичлачисса аьпалул мажлисру. МуницIунна кIицI лаглай бия ЦIуссалакрал район сакин хьуну 75 шин хъанахъисса юбилейгу.
Райондалул цинярдагу щархъаву хьунни боевиктурайн данди бавцIуну жанну дуллуми дакIнийн бичлачисса аьпалул мажлисру.
Микку гьуртту хьунни ДР-лул БакIчи Владимир Васильев, АьФ-лул ПаччахIлугърал Думалул депутат Аьвдулмажид МахIрамов, Ростовуллал областьрал ФСИН-далул Управлениялул хъунама, Виваллил къуллугърал генерал-лейтенант Муслим Даххаев, Липецкаллал ОМОН-далул командир, майор Сергей Сковородин, ДР-лул БакIчинал Администрациялул Управлениялул хъунама Артур Исрапилов, ДР-лул Халкьуннал Мажлисрал депутат Амирхан Амирханов, ДР-лул экономикалул министр ХIажи Султанов, ДР-лул миллатрал политикалул министр Энрик Муслимов, ДР-лул жагьилтурал политикалул министр Камил Саэдов, Лакрал райондалул бакIчи Юсуп МахIаммадов ва цаймигу бусравсса хъамал. Мероприятиярттай гьуртту хьун оьвкуну бия ЦIуссалакрал аьрщарай къучагъшиврий жанну дуллусса аьралитурал нитти-буттайн ва гъан-маччанайн.
![](http://ilchi.beget.tech/wp-content/uploads/2019/09/IMG_7329.jpg)
[dropcap]М[/dropcap]у бакъассагу, кьинилул кьадру хъун бан бувкIун бия ЦIуссалакрал райондалущал уссурвалшиврийсса дахIавуртту дусса Къиримнавасса, Костромалиясса, Къазаннаясса, Ингушнавасса, Чачаннавасса делегацияртту.
Мероприятиярттал дайдихьу хьунни ТIюхчардал шяраву. Гикку тIиртIунни, ТIюхчардал пострай боевиктурал оьсса зулму бувну, оьрмурдацIа бувсса «Витязь» спецназрал аьралитурансса гьайкал.
ТIюхчардал шяраваллил зума-къирагърай аьс бувну бивкIссар Калачай бригадалувасса 6 аьраличу: Василий Ташкин, Алексей Липатов, Алексей Полагаев, Борис Эрднеев, Владимир Кауфман, Алексей Паранин. Вай аьщун бивзсса кIанттай Сергиево-Посадский ОМОН-далул зузалтрал бацIан бувну буссар гьайкал хIисаврайсса хъунмасса ххач, гиккура дуссар ЦIуссалакрал райондалулгу цала чулухасса аьралитурал аьпа абад буллалисса гьайкалгу.
Утти лахъазанттуй тIивтIунни, ряхагу аьраличунал суратругу дирхьусса, лухIисса мармарчарил мемориалданул комплекс.
Гьайкал тIитIлатIисса мутта бия хъинну асар хьунсса, бюххансса. Цинявннал иттав макь дучIан дурунни Къалмукьнава дуркIсса Эрднеев Борислул ниттил, хъювсулгу дурккун, цила арс дакIнийн утлай, бувсса ихтилатрал.
![](http://ilchi.beget.tech/wp-content/uploads/2019/09/IMG_6778.jpg)
— ЧIун-чIумуй бучIару жу ЦIуссалакрал райондалийн жула арснал гьаттайн биян. Та бучIарчангу, марцIну, лазиларкьуну, тIутIив дирхьуну дикIай. Барчаллагьрай буру вай оьрчIал дурсса чувшиву хъамакъаритлай, аьпа буручлай буну тIий, — увкунни Борислул нитти-буттал.
«Алексей, ттул арс, багъишла рити, къавхьунав ттуща ина уруччин», — тIий, аьгу аьтIий, тIутIал кацI гьайкалдануцI бивхьуна ТIюхчаратусса АьтIикIат Табиевал (ва бивкIссар Алексей къачагътурая лаитан хIарачат буллай).
Укунмасса якьамасса аьпалул мажлис хьунни Аьрасатнал Виричу Алексей Козиннул цIанийсса ЦIуссачIурттащиял школалул хIаятравугу, гиккугу тIиртIунни Козиннун гьайкал. Цила арснал дурсса къучагъшиврия якьамагу дурккун буслай дия Алексейл нину Лариса Козина.
— На дакIнихтуну барчаллагь тIий бура ттула арснал аьпа буручлачисса Дагъусттаннал халкьуннахь, ЦIуссалакрал жяматрахь. Ттула Ватандалийнияр бусраврай ур ттул арс зучIа. Зул аьрщигу, зул агьлугу ттун дакIнихтуну ххира хьунни, — увкунни Ларисал цила ихтилат къуртал буллай.
ЦIуссачIурттащиял жяматралгу Виричунал ниттил хъачIунттайн ххаллилсса чалагъай руртунни.
Аьралитурал нину-ппу, гъан-маччами барчаллагьрай бия ЦIуссалакрал райондалул администрациялул каялувчитурайн, ххуллун харжгу бивхьуну, цайнма гиккун оьвчаврихлу.
Хъиривмур аьпалул мажлис хьунни «Телевышка» лахъазанттуй: кIиккура тIиртIунни гьайкал.
Бусалардавун багьссар чIирисса милицалтрал кьюкьа 100-хъул боевиктурайн данди дарцIуну, жандалия ка ларсун, лахъазан дуручлай диркIсса куц. Таний ккаккан дурсса къучагъшиврухлу Аьрасатнал Вирттаврал цIарду дуллуссар лейтенант Халид Мурачуевлун ва сержант Мутай Исяевлун.
Щархъаву аьпалул мажлисру бувну мукьах цинявппагу бувкIуна байрандалун хасну чIюлу бувсса ЦIуссалакрал шяраваллил майданнив. КIикку сакин бувну бия дагъусттан миллатирттал майданну.
Республикалул БакIчи Владимир Васильев, ЦIуссалакрал райондалул хъунама ХIажи Айдиев ва Муслим Даххаев бакIчисса делегациялул, райондалул жяматрал тIутIив дирхьунни 1999 шиналсса иширттаву жанну дуллусса Вирттаврал гьайкалдануцI.
Райондалул агьалинащал Владимир Васильев ия миллатирттал майданнай тамаша буллай, аслу-суаллу буллай, дакIний личIансса суратру ришлай.
Хъирив байбивхьуна шадлугърал мажлис.
Райондалул жямат барча буллалисса ихтилат бувна Республикалул БакIчинал. Мунал кIицI ларгуна, 1999 шинал Дагъусттаннайн ярагъуннищалсса къачагътал ххявхсса чIумал, ЦIуссалакрал райондалул жяматрал ккаккан дурсса чувшиву. ДакIнийн бувтунни, ЦIуссалакрал райондалий хьусса дяъвилул иширттаву ккаккан дурсса къучагъшивурттахлу, 13 виваллил иширттал зузалан ва аьралитуран Аьрасатнал Вирттаврал цIарду дуллушиву. Бусраврай кIицI ларгунни лейтенант Эдуард Беланнул, Андрей Тепериклул, Халид Мурачуевлул ва Мутай Исяевлул цIарду ва Муслим Даххаевлул, Сергей Сковородиннул дурсса къучагъшиву.
1944 шинал лакрал агьали цала минардая бизан бувну, ЦIуссалакрал райондалул гьану бивзния шихунмайсса тарихрая ва 75 шинал лахъишиврий хьусса хьхьичIуннайшивурттая ва дахханашивурттая бусласисса ихтилат бунни ХIажи Айдиевлул.
Хъирив ихтилатру бунни Муслим Даххаевлул, Сергей Сковородиннул, Ульяна Акаевал.
Бюххансса ихтилат бунни Липецкаллал ОМОН-далул командир Сергей Сковородиннул.
— ХIакьину зу махIаттал бувну буру ЦIуссалакрал райондалул агьалинал узданшиврул, хъамал ххирашиврул. Нарив 20 шинал хьхьичIва махIаттал унна вайннал агьалинал чувшиврул ва чумартшиврул, — увкунни ванал.
Цинявнналагу гурну хъатру ришлай, ххарину кьамул дунни Сергей Сковородиннун дуллусса награда – «Дагъусттаннал миллатрал Виричу» тIисса бусравсса цIа.
Андриана Аьбдуллаева,
Имара Саидова