![](http://ilchi.beget.tech/wp-content/uploads/2019/09/IMG_2205-17-09-19-11-59-1.jpg)
[dropcap]Ц[/dropcap]Iуссалак боевиктурая мурахас бувну 20 шин шаву кIицI лаглагисса кьинигу мукьал дярххун нанисса вара Ххувшаврил байран дия.
ЯхIирал ябуллалисса, дурк кьини чувшиврий лархъсса ва мудангу лахълайнмасса ЦIуссалакрал райондалул жямат ва кьини шайкун хъамаллураха (хъамаллив цайми регионнаятусса чIявуя!) хIурмат- аякьалий бия. Тасса-танингу иттала къадукьлантIисса пашмансса суратругу, лахIзардугу Голливудрал цIадурк режиссертурал хьурдай учинсса бия.
ПатIимат Рамазанова
Мариян Илиясовал цIанийсса «Дараччи» фондрал душваврал ябавцIуна, паракьатну мурхьирал ххютулугу авцIуну, иттав макь гьурххи хьусса хъамаличунай. Га ЦIуссалаккуй жан кьурван дурсса виричунал ппу лявкъуна. Цала арснал Алексейл аьпалул хIурмат буллалисса жяматрайнгу, ЦIуссалакрал райондалул хъуниминнайнгу барчаллагьрай, дуллалисса къулагъас асар хьунни тIий ия га. Гульшан Хасаева, Мариян Кьаландарова, Тарият Къапиева, ганал лагма лавгун, дакI хьунмур буслай бия. Яла Гульшан Хасаевал учинтIиссар: «Та кьинигу, хъирив кьинигу та адаминал симан хъамаритлай дакъар, 20 шин гьарчагу, дахьа лахьхьу арснацIа хьусса куннасса, дазу-зума дакъасса къюву дия танал яруннаву», — куну.
Буниялттунгу, чIумулгу, шиннардилгу чIувингу, лещангу къадувай къювулул дардисан – чил канища арсру ливтIу нитти-буттахъал хIасратгу, аькьувагу…
![](http://ilchi.beget.tech/wp-content/uploads/2019/09/FullSizeRender-17-09-19-11-.jpg)
арснал гьайкалданийн
чул бивщуну
ДакI шиши дагьан дуллалисса цамургу лахIза: Виричу Алексей Козиннул нину Лариса Александровна, арснал гьайкалданийн ссюрхъгу рирщуну, бавцIуну бия, арснал хъачIрай бакI дирхьусса кунма. Къазаннаятусса 23 шинал оьрмулувусса лейтенант Козин 1999 шинал Ростовуллал областьрай усса чIумал, ниттил ваначIан гьан дурсса арцу зана диркIун дур, «Бавай, арцу вин виннагу аьркинссар» тIисса чагъарданул кьютIлищал. Ца акъа-акъасса, ишин-итан кIану бакъа ххирасса арснал аьрали пиша язи бувгьуну ччай къабивкIун бур ниттин. Кьянкьа- кьурчIисса Алексей лахIан уван хьуну бакъар. Лариса Козинал Алексей уваннин кIива оьрчI ливну бур, мурадиран увсса Алексейгу, ласнаягу личIи хьуну, цина хъуна уллан багьну бур. Яла ванащал архIал Дагъусттаннай бивкIминнал бусантIиссар гитаралухун балайрду тIун ххирасса Алексей махъ-зуманив машгьурсса балайрду — «Не остаться в этой траве», «Офицеры, ваше сердце под прицелом», «Последняя осень» ччя-ччяни тIий ивкIшивугу. Ванал оьрмулул махъра-махъмур ссут хьуну дур ЦIуссалакрал аьрщарай. Цувагу, балайлуву тIийкун, «къаурттувунча», абадшиврувун лавгун ур. Сентябрь зуруй Лариса Александровнал Алексейл частьрал хъуниминнайн, Алексейл щарсса оьрчI бавай дур, оьрчIан ппу къаккавккун къаличIан, итаакьира шавай тIисса миннат буллалисса чагъар чивчуну бивкIун бур, дахьра дурцусса щарссаничIан ва увантIисса оьрчIачIан итаакьинхьуви тIисса тамахIрай. Му чIал хьусса чагъарданулгу Алексейщал ца частьраву бивкIми банд лаган бувну бур: Алексей боевиктурал оьрмулуцIа увну ивкIун ур му хIалатраву. ЧIумуяр хьхьичI увсса Алексейл арсгу кIира нюжмардийсса акъа къаяхьуну ур. Лариса Александровналгу, щил ци бувну, ци банссия?! Лавмартшиву, оьккишиву дяъвилул сиккурал!
Агьалинал дакIру хъюлчай тIутIи дуллайнувасса бур ТIюхчаратусса АьтIикIат Табиевал, цIу ларчIсса танкрава гуж-балагь ххассал хьуну, цаланийн тIайла авцIусса БМП-лул водитель-механик Алексей Полагаев боевиктураща ххассал увансса хIарачатрал эпопеягу. Боевиктурал: «Вин му оьруснал ци банна, циван лаитлай бура му, ккаккан ува лаивтсса кIану», — увкукун, АьтIикIат бур: «Ва кIусса щаву дирсса жагьил ур — оьрусра, къаоьрусра, личIишиву цир, щаву дирсса гьарманангу кумаг бувайссар, зугу ва иширахун багьарча, зунгу бувантIиссия вава кумаг, лажиннича, рахIму бувара гъурбатрай щаву дирманай!» — тIий. РахIму бувайссарив оьттух къанихну ярагъ кIунттил бугьайминнал? АьтIикIат Табиевамур, 20 шин лагайхтугу, ТIюхчарав дацIан дурсса гьайкалданий тIутIивгу дихьлай, аьтIийнма бур багъишла битира тIий, Алексейхьгу, ганал гъанцириннахьгу, боевиктурал ххяппурттаща га ххассал уван къабювхъуну тIий. АьтIикIатлул цила тIийкун, жанавартраща ххассал уван хьун бюхъайва, буниялттунгу, жиндралсса боевиктуращанияр. РахIму бакъашиву, оьккишиву дяъвилул сиккурал! КуртIшиву дяъвилул щавурдал! Лахъишиву дяъвилул аькьувалул тарихрал!