ЦIуссалакрал район дунияллул террористурая мурахас дурну 20 шин бартлагаврицIун бавхIуну Ростовуллал областьрал ФСИН-лул управлениялул хъунама, виваллил

къуллугърал генерал-майор Муслим Даххаев хьунаавкьунни 1999-ку шинал дяъвилул иширттаву къуллугърал бурж биттур буллай жанну дуллусса милицанал зузалтрал кулпатирттащал, гъан-маччанащал. Таний Муслим Даххаев ивкIссар ЦIуссалакрал РОВД-лул хъунаману. Жанну дуллусса зузалтрал кулпатирттащалсса хьунабакьавугу ванал сипталий хьунни.

А. Аьбдуллаева
[dropcap]Ш[/dropcap]икку гьуртту хьунни ЦIуссалакрал райондалул бакIчи МахIаммадхIажи Айдиев, райондалул прокурор Светозар Оьма­ров, райотделданул хъунаманан кIанайсса Шакир Нахаев. Аьмсса ихтилат бувну махъ, М.Даххаевлул, гьарцанначIан личIи-личIину гъан хьуну, аьркин багьлагьисса кумаграл хIакъираву цIухху-бусу бунни.

— Ккавкказнаву, щалагу Аьра­сатнаву дакьаву дуруччаврил цIаний жанну дуллуссар зул ласурваврал. Ми зана бан къахьунссар. Журив мудангу зул чIарав буссару. Та дяъвилий жула зузалтрал ккаккан дурсса къучагъшиву жула халкьуннан тачIав хъамакъаритантIиссар. Ялун нанисса ник тайннал эбрат­райри тарбия хъанантIисса, — увкунни Даххаевлул.
Милицалтрал щахъаннилгу бувсунни ванахь цала-цала буруккинттая, тавакъю бунни цIусса миналий аьрщи ласун, духсса къатри дакьин даврин кабакьу бувну ччива куну.

Хасъсса органнал вай масъалартту щаллу бан цала бакIрайн лавсунни.
Гихунмай чяйлул ссупралухун аьчухсса ихтилатру ва дакIнийн бичавуртту хьунни. Хъирив цинявппа лавгунни «Телевышкалийн», та дяъвилул мугьалттуву ливтIуминнан дацIан дуллали­сса гьайкал ххал дан. Лахъазанттуй дакIний личIансса суратругу рирщунни.