Кьубиял шяраву тIивтIунни цIусса ФАП

Тталаткьини Кьубиял шяраву, чIявусса агьлугу бавтIун, хьунни фельдшер-акушернал пункт тIитIлатIисса шадлугъ.

Зулайхат Тахакьаева
Микку гьуртту хьунни ДР-лул шяраваллил хозяйствалул ва дукиялул министрнал хъиривчу Шамил Аьлиев, Лакрал райондалул администрациялул бакIчинал хъиривчу, экономикалул ва шяраваллил хозяйствалул управлениялул каялувчи Макьсуд Кьадиев, Кьубиял шяраваллил бакIчи Заурбаг Исупов, райондалул азарханалул хъунама хIакиннахлу чIумуйну зузи­сса Мадина Аджиева, шяраваллил агьлу.
Кьубиял жямат Юсуп Ма­хIаммадовлул цIания барча буллай, Макьсуд Кьадиевлул кIицI лавгунни райондалул администрациялул хьхьичI бавцIусса ца яла агьамсса масъалану ккак­лай бушиву агьалинал цIуллу-сагъшиву дуруччаву ва махъсса шиннардий республикалул каялувчитурал кабакьаврицIух райондалий хъуннасса къулагъас дуллай бушиву му иширах.

Ва хъанай бур кIилчинсса ФАП, шяраваллил кIанттурду хьхьичIунмай баврил цIаний зузисса республикалул Шяраваллил хозяйствалул ва дукиялул министерствалул программалул лагрулий бувсса. Ларгсса шинал ФАП бувссар Ххюлу­ссуннал шяраву. Шяраваллил хозяйствалул министерствалул ка-кумаграцIух бувссар райондалул администрациялул ЧIарттал шяраву­сса ФАП-гу. ЯлунчIилгу райондалий бан ккаккан бувну бур шанма ФАП.

ФАП тIитIаврил щадлугъ райондалул 90 шинал юбилейрал хьунийн хъанай духьувкун, Макьсуд Кьадиевлул баян бунни муний гьуртту хъанахъисса цинявппагу хъамаллурайн Юсуп МахIаммадов оьвтIий ушиву байрандалийн.

Шамил Аьлиевлул бувсунни республикалул Шяраваллил хозяйствалул министерствалул щурущи дурсса программалул лаг­рулий Дагъусттаннал чIярусса шяраваллаву бувну бушиву ФАП-ру, спортрал майданну (ца мукунсса майдан юбилейрал кьини тIитIинтIий бур Гъумукгу). КIицI лавгунни ми программарттаву ва республикалул социал-экономикалул тагьар хьхьичIуннай давриву Лакрал райондалулгу чялишсса гьурттушинна дуллай бушиву. Барчаллагь увкунни райондалул агьалинахь аьрщараха ва ризкьилуха буллалисса захIматрахлу.

Ихтилатру бунни Мадина Аджиевал, Къизилюртуллал азарханалий зузисса Кьубиял шяраватусса хIакин Минкаил Вагьабовлул.
Заурбаг Исуповлул ва ФАП-рал хъунмур ПатIимат НякIучиевал Кьубиял жямат­рал цIания барчаллагь увкунни республикалул Шяраваллил хозяйствалул министерствалул ва Лакрал райондалул каялувчитурахь шяраваллин дурсса хъуннасса бахшишрахлу.

Муния махъ хъамаллурал ххал дунни ФАП-рал къатри. Цивунгу бухлай бур фельдшернал, акушернал ва процедурарду дайсса кабинетру. Идаралул хIаят дур, лагма чапаргу дурну, лази-ларкьусса.
Шадлугърай гьурттушинна дунни райондалул магьирлугърал къатлул зузалтрал ва Кьубиял школалул дуклаки оьрчIал.