Кьадиева Амалия Нажмуттиннул душ ШавкIуллал библиотекалий зий гьашину там хъанай дур 50 шин. Му юбилейран хас бувсса мажлис хьунни ттигъанну Лакрал райондалул магьирлугърал къатлуву. Амалия барча бан бувкIун бия райондалул магьирлугърал къатлул ва библиотекардал зузалт, райондалул хъунама Абакар Къюннуев, ШавкIуллал шяраваллил хъунама Аьбдул Аьлиев.
Ва шадлугъ дачин дурсса райондалул библиотекалул хъунмур Аьишат Хизриевал Амалия барчагу бувну, бувсуна ванил оьрмулия ва даврия.
Амалия бувну бур ШавкIуллал шяраву 1940 шинал. 7 шин хьусса чIумал вайннал кулпат бивзун бур Туркманнавун Мары тIисса шагьрулийн. Дуклай бивкIун бур тийхва. 10-мур класс къуртал бувну бур Гъумук.
Амалия хъунма хьуну бур буттал лажин ккаккан кьисмат къархьуну. Ванил ппу 1939 шинал увцуну ур Урюпинск шагьрулийн Бахьттагьалтрал училищалувун дуклан. Тиччагу гьан увну ур Брест шагьрулийн. Ванал училище къуртал байхту дяъви байбивхьуну, тиччава цалла частьращал аьрайн гьан багьну бур. «Вила инава бурувччуну бикIу, душгу буручча», тIисса чагъар тIайла бувккун бивкIун бур кулпатрачIан. Цувагу 1942 шинал ятIа-тIар бакъа акъа хьуну ур.
Цинна кIулши хьуния мукьах Амалия байбивхьуну бур, буттал бакIрачIан бувкIмур кIул баншиврул, личIи-личIисса кIанттурдайн чичлай. Амма цуксса хъирив букларчагу, ванища буттал гьав дусса кIану лякъин бювхъуну бакъар.
Гъумучиял школа къуртал байхту цIунилгу Туркманнавун лавгун, тийх къуртал бувну бур бухгалтер шайсса училище. Зий бивкIун бур Мари шагьрулул строительствалул управлениялий бухгалтерну.
1961 шинал ШавкIрав зана хьуну, щаргу хьуну, зий байбивхьуну бур шяраваллил библиотекалий. Гъирарай зий бур хIакьинусса кьининингу. Ва лайкь хьуну бур чIярусса грамотардан, барчаллагьрал чагъардан. Ларгсса шинал ахирданий Амалиян дуллуну дур «Дагъусттан Республикалул культуралул бусравсса зузала» тIисса цIа.
Амалиял ххуйсса тарбия дуллуну хъуни бувну бур ряхва оьрчI.
Райондалул администрациялул хъунама Абакар Къюннуевлул кIицI лавгуна Совет заманнай шяраваллал клубругу, библиотекардугу бивкIшиву магьирлугърал ужагъруну, ми идарарттал зузалтгу лаглай бивкIшиву мащайх, къутаннайх, Амалиялгу ми агитбригадарттал давриву хъунмасса захIмат бивхьушиву.
Амалия барча буллай, дуллуна арцуйнусса бахшиш. Мукунма арцуйнусса бахшишращал Амалия барча бувуна ШавкIуллал шяраваллил хъунама Аьбдул Аьлиевлулгу. Аьишат Хизриевалгу дуллуна библиотекалул зузалтрал чулухасса бахшиш. Амалия балайрдайну барча бувуна АьлихIажи Щамхаловлул, Арсен Хановлул, Мариян Жамалуттиновал.
