![](http://ilchi.beget.tech/wp-content/uploads/2019/10/PHOTO-2019-10-01-16-49-11.jpg)
[dropcap]О[/dropcap]ктябрь зурул 1-нний щалагу билаятрай кIицI лагай Бугьараминнал кьини. Аьрасатнаву ва байран кIицI дуллан бивкIун бур 1991-ку шиная шихунмай.Бугьараминнал байрандалуцIун бавхIуну ттун бусан ччива цала оьрмулул хъунмур бутIа Ссибирнаву гьан бувсса, чил кIанттурдай цаламиннаяргу бусравну усса аьлимчу, Аьрасатнал Элмурдал академиялул ветеран, АьФ-лул лайкь хьусса экономист Щурпаев ХIажи Кьасимлул арснаяту. Гьашину ванал оьрмулул 85 шин бартларгунни.
Андриана Аьбдуллаева
Увну ур ХIажи 1935-ку шинал апрель зурул 13-нний Гъумук. Мусил медальданий Буйнакскаллал школа-интернатгу къуртал бувну, увххун ур Москавуллал финансирттал институтравун. ЗахIматрал ххуллу байбивхьуну бур Новосибирскаллал областьрал исполкомрал финансирттал отделданул хъунама экономистнал къуллугърая. Ва давугу хъуннасса жаваблувшинна ва тIалавшинна дусса даву диркIун дур.
Амма цала пиша ххуйну кIулсса ХIажинал му лавайсса даражалий щаллу дайсса диркIун дур ва мудан ххуйсса ккаккияртту чIалачIи дайсса диркIун дур.
Лавайсса даражалул пишакар хIисаврай, 1972-ку шинал ва увцуну ур зун СССР-данул Элмурдал академиялул Ссибирнал отделениялийн.
[dropcap]Ш[/dropcap]икку ХIажи зий ивкIун ур цал планово-финансовый управлениялул хъунаманал хъиривчуну, яла материально-технический снабжениялул управлениялул хъунаману, мунияр махъ экономикалул ва финансирттал масъаларттаха зузисса председательнал хъиривчуну. Совет Союз тири-хъири хьуну махъсса шинну, цинявннан кунна, вайннангу захIматсса хьуну дур. Амма захIматсса шартIирдайгу ХIажинал цала даву лавайсса даражалий дайсса диркIун дур. Ванал кIулшивурттугу, опытгу ми шиннардий ххуйну бучIи лявкъуну бур. Хъиннува ялун ливчуну бур ванал каялувчинал бюхъу-бажаргу.
[dropcap]М[/dropcap]оскавливсса къуллугъчитурайн, министерстварттайн ва ведомстварттайн увккун, ХIажинал щаллу байсса бивкIун бур яла захIматми масъаларттугума. Мунийнугу ва хъиннува бусрав хьуну ур архIал зузиминнан.1995-ку шинал Аьрасатнал Элмурдал академиялул президиумрал заседаниялий академиялул президент Ю. Осиповлул «Аьрасатнал элмурдал тажрайсса ттиркьюкьи», — куну, лавайсса кьимат бивщуну бур Ссибирнал отделениялул даврин.
[dropcap]Ч[/dropcap]Iявучингу бувчIлай бивкIун бур укунсса кьимат лайкь бавриву ХIажи Кьасимовичлул ва мунал каялувшиндаралусса коллективрал захIматрал бутIа хъунмасса бушиву. ХIажи Щурпаевлуя чивчуну бур «Наука в Сибири» тIисса кказитрай. Миккува бур ванан хас бувсса шеъригу. Жунгу пахру багьлай бур архсса Ссибирнаву жула лаккучу укун бусравну ушиврия.
Бугьараминнал кьинигу барча тIий, чIа тIий буру ванан цIуллушиву ва бигьа-рахIатсса оьрму.