Дайдирхьунни цIусса дуккаврил шин. Аьдатравун дагьсса кIулшивурттал байран гьашину сентябрьданул кIилчинсса кьинилийн тIайла дарцIунни.
Ва кьини, цинявппа школардалсса кунна, ЦIуминалийсса Гьамиящиял школалул хIаятгу тIутIал кацIурдищалсса тяхъасса оьрчIал, чIюлусса учительтурал ва нитти-буттал дурцIуну дия.
А. Аьбдуллаева
[dropcap]Л[/dropcap]ехлай бия балайрду, баллай бия ххарисса оьрчIал чIурду. Школалул хIаятгу байрандалун лархьхьуну чIюлу дурну дия. КIулшивурттал кьинилун хас дурсса шадлугърал линейкалий гьуртту хьун бувкIун бия бусравсса хъамал: ДР-лул экономикалул министр ХIажи Султанов, ЦIуссалакрал райондалул администрациялул хъунаманал хъиривчу ХIажи ХIажиев, ЦIуссалакрал райондалул цIуминалийсса азарханалул хъунмур хIакин Булбул Исрапилова. Байрандалул заллухърурив бия цалчин школалийн бувкIми.
[dropcap]Ш[/dropcap]колалул директор ПатIимат Надировал барча бунни дуклаки оьрчIру, учительтал ва нину-ппу цIусса дуккаврил шинащал, чIа увкунни дуккавриву тIайлабацIу, ххуй-ххуйсса ккаккияртту ва хьхьичIуннайшивуртту. Ххуйну дуклакисса оьрчIан, мукунма дуклаки оьрчIру ГИА-дайн хIадур буллай бивкIсса математикалул учительтал С.Кьурбанован ва Р.Муртузалиеван директорнал грамотартту дуллунни. ОьрчIру барча буллалисса ихтилатру бунни хъамаллуралгу.
Цала ихтилатирттаву вайннал кIицI лавгунни цуксса агьамсса кIану бугьлагьиссарив кIулшивурттал инсаннал оьрмулуву. Ихтилатру къуртал хьуну махъ цалчинмур классравун бувкIминнал дурккунни назмурду, хъуниминнал ккаккан дунни къавтIавуртту. Хъирив 11-мур классрал дуклаки душ Т.Кьурбановал ва 1-мур классравун бувкIминнал бивщунни дуккаврил шин дайдирхьушиву бусласисса цалчинсса гюнгутIи. ОьрчIру цала-цала классирттавун бувххун махъ классрал каялувчитурал дирхьунни Дакьаврил дарсру, дунни Хъунмасса Буттал кIанттул цIанийсса дяъвилий Ххувшаву ларсун 75 шин шаврин хас дурсса классрал ссятру.