Вай гьантрай ЧIяйннал шяраватусса ХIамидлул ва СахIивлул лайкьсса душнин МахIаммадова Сонян ниттил бувну бартлаглай дур 60 шин.
Буттал шяраву ххаллилсса кьиматирттай къуртал бувссар Сонял школа. Дуклакиссаксса хIаллайгу, яла махъгу ванил хъинну хъунмасса хIарачат бивхьуссар, мяйва оьрчIгу махъ кьабивтун, ппу аьпалухьхьун лавгун мукьах захIматшиврухун дагьсса ниттил чIарав бацIан, хъуними уссу-ссурвавращал архIал къатлул хъар цийннагу ларсун – дуллай дачIину лирчIсса къатригу, цайми-цайми ичIаллил агьамсса давурттугу чулийн дуккан дуван.
[dropcap]М[/dropcap]уния махъ Сонял мукунма хьхьичIунсса кьиматирттай къуртал бувссар Курскаллал паччахIлугърал педагогикалул институт. Дипломгу лавсун, бувкIссар Каспийскаллал шагьрулийн. Зун бивкIссар 23-мур оьрчIал садикрал хъунмунил кумагчину. Зузиссаксса хIаллай ванил чIалачIи бувссар цуппа даву кIанийн дуртун, магьирну дайсса, захIматшивурттаятугу хIучI къачайсса зузала бушиву. Ахиргу Соня бувчIуссар мува садикрал каялувчину. Зийгу бивкIссар жард къаувкуну му жаваблувсса къуллугърай хIакьинусса кьинилийн бияннин. Бартгубивгьуссар цаннияр ца язисса ва хьхьичIунсса мурадру. Ванийн барчаллагьрайсса бакъа къавхьуссар оьрчIал нитти-буттахъулгу.
Ванил хIалал бувссар чIявусса барчаллагьрал чагъарду, бахшишру, ванин дуллуссар «Почетный работник общего образования» тIисса цIа.
Жагьилсса оьрмулий ласгу оьрмулуцIа хьуну, Сонян багьссар арсгу, душгу ликкурай бацIан бан, миннан ппу акъашиву кIул хьун къаритан. Ларайсса кIулшивурттугу ларсун, дахIалай чинну буккан бувссар чивун.
Жунма ххирасса инсаннал оьрмулул ххаллилсса юбилейгу барча дуллай, чIа тIий буру Сонян цIакьсса цIуллушиву, цIу-цIусса ххуй-хъиншивуртту, цила чумартсса ва уздансса дакIнин лавхьхьусса кьисмат, нахIушиву, хIалимшиву.
Ина Аллагьнал оьрмулул буччиннин битаннав винма ххираминнал дянив! ЯхI ххину дирчуссар ина вилла шинну!
Виха мудангу дуаьлийсса вилцири, оьрмулул дустал, даврил уртакьтал
Соняха ласнал ниттил бувсса шаммардава
Цукун чичин хъинавав
Вил инсаншиврияту,
Гьарца тIулуй цIу бусса
Ттул арснал ляълу-жавгьар.
Лахъмур ялтту гьан байсса,
Лагьмур лултту гьан байсса,
Къатлуву нахIушиву
Аякьалий ядурсса.
Хьуссара ттун душнугу,
ДушницIунсса ссунугу,
Ссавур ххисса ттул мусий,
Ххирассара ина ттун.
ЧакличIагу гьар мудан
Дуссара на дуаьлий
Вил лякьлуяту дирзсса
Вай кIирагу тIимулийн.
Яраппий, зу яхьуннав
Ялув Заннал цIимилий,
Мяммал дадал чанихъул,
Мяммал дадал ххирахъул!
ПатIимат Мусаева,
ш. Хьур
