Дагъусттаннал Чичултрал союзрай, Расул ХIамзатовлул музейраву, хьунни Дагъусттаннал халкьуннал чичу Мирза Давыдовлул юбилейран хас дурсса батIаву.
Андриана Аьбдуллаева
[dropcap]М[/dropcap]ажлис тIитIлай, ихтилат бувна Даниял Магьдиевлул. Ванал бувсунни шаэрнал оьрмулия ва творчествалия. ЛяличIинува авцIунни ва «БивкIулийн лажинну» тIисса, 1999-ку шинал ЦIуссалакрал райондалий хьусса ишру аьч буллалисса ва лакрал чиваркIуннал чувшиву ккаккан дуллалисса трилогиялий. Мукунма ихтилатру бувуна Ш. Шалласуевлул, Роза Илдаровал, Аьвдуссалам Магьдиевлул, Хан Башировлул ва м.ц.
Ихтилатру бувсса цинявннал кIицI лавгунни Мирза Давыдов чIявуссаннал чIарав авцIушиву, жагьилминнал гьунарду ялун личин бувшиву, хIакьинусса кьинигу лакрал секциялувун цIу-цIусса инсантал кIункIу бан хIарачат буллай ушиву.
Ахирданий цинявннахь барчаллагь тIисса ихтилат бунни чичул цала.
Заседаниялий маслихIат ккавккунни М. Давыдовлун «За заслуги перед республикой» награда дулун Дагъусттаннал каялувчитурайн буккан.
