Июнь зурул 8-нний «Гильдия строителей СКФО» Ассоциациялул Президент Аьли Шяъбановлул, хъунама директор Запир Акаевлул ва вице-президент ХIажи Султановлул ххал диргьунни «ЦIуссалакрал райондалия лак ЦIусса миналийн бизан баврил ва Аухуллал район цIу дуккан даврил» программалул лагрулий дуллалисса объектру.
Объектру ххал дигьин хьхьичI «Новострой» строительствардал объектирдал дирекциялуву хьунни кутIасса совещание. «Новострой» ДР ГКУ-рал директор Аьли Аьлиевлул ва хъунама инженер МахIмуд МахIаммадовлул бувсунни бизан баврин хас дурсса программа щаллу даврия, мукунма республикалул властьрал органнал ва федерал центрданул кумаг бакъанма щаллу бан къашайсса масъаларттая.
Аьли Аьлиевлул кIицI лавгунни, 2012 шиная байбивхьуну, 119 къатта сайки хIадурну бушиву (70% давуртту дурну душиву).
– Объектру къуртал бувну бакъар, хIатта ми къуртал бан аьркин дагьлагьисса арцу итадаркьуну диркIун дунура. Мунин багьанагу хьуссар тай къатри дуллалисса чIумал арцу дарцуну диркIшиву. Тахсир хьусса инсантуран танмихI бувссар. Къатригу къуртал къадурнура лирчIссар. Жунгу ми ядуллалисса къаралданун арцу дуллан багьлай бур. Вай къатрал инвентаризациягу дурну, ттиния тихуннай дуллансса давурттал хIакъи-хIисав дарду. Дузалну буссар къатрал документру. Строительствалул давугу къуртал дурну, заллухъруннахьхьун тапшур баншиврул, аьркинну дур арцу. ХIатта хIукуматрал ми къатри дан 300 млн арцул итабавкьуну бивкIун бур. Хасъсса органнайн чивчусса аьрзардал хIакъиравугу жун цукунчIавсса жаваб къадуркIунни,– бувсунни Аьли Аьлиевлул.
Аьли Шяъбановгу авкьунни Аьли Аьлиевлул тIутIимуницIун.
– Жул хIисаврттайн бувну, уттигу 50 млн дирсса арцу аьркин хъанай дур (ца къатлун 450-500 азарда къуруш). Ми арцу итадакьирчан, архIалла дузал хьун най бур 120 къатри. Жу хIадурду вай къатрал строительствалул давурттавух гьурттушинна дан. ЖучIа бур строительствалул давурттансса харжлугъ бюхъавай чан дансса хIукмурду. Жула партнертуращал хIала-гьурттуну зузаврийну, жуща бизан баврил программалийн багьайсса чIявусса масъалартту щаллу бан бюхълай бур, – увкунни Аь. Шяъбановлул.
Совещаниялий мукунма ххал бивгьунни канализациярттал ва шяраваллал ххуллурдал масъалартту. Совещание къуртал хьуну мукьах ххал бунни строительствалул объектру. ДучIиннал шяраву ххал дунни пандемиялул чIумал «Мегаполис» ООО-лул дуллай бивкIсса садикрал къатри. Тай шартIирдах къабурувгун, вай цила чIумал къуртал дурну дур, амма 2020 шинал сентябрь зуруя шинмай 90 оьрчIансса садик зузи бан бюхълай бакъар, щаллу бан багьлагьисса документирттал цIаний.
Подрядний организация жаваблувссар цалла дурсса къатри ядуллалисса къаралданун харжлугъ бишин. МуницIун бавхIуну Аьли Шяъбановлул кIицI лавгунни ца-ца чIумал Дагъусттаннал строительтурахун багьана бакъанма бахчилан бикIайшиву, хIатта миннан аьркинсса куццуй ва цила чIумал къатри дуллай бунугу. Му зат исват буллай бур садикирттацIун бавхIусса иширалгу.
Хъирив делегациялул ххал диргьунни марцI дуккан дайсса сооруженияртту. Вайннул хIакъираву МахIмуд МахIаммадовлул бувсунни сооруженияртту дурну къуртал шавай душиву, так лагма-ялттусса кIанттурду бакьин бан ва оборудованиялул монтажрал давуртту дан лирчIшиву. ПаччахIлугърал кьутIилийн бувну, ми давуртту къуртал дан аьркинссар август зурул дайдихьулийннин.
Суткалий 4000 кб метра марцI дуккан дансса гуж бусса сооружение шанна шяраваллин ккаккан дурну дур: ЦIуссалакрал, ЦIуссаккуллал ва Чапаево шяраваллан. Мукуннасса, марцI байсса, сооруженияртту 2019 шинал дурну диркIссар Аьхъарав, Шушияв, Гьамияхь, ЦIуссачIурттахь ва ДучIив. Вай циняв сооруженияртту архIал зузи дантIиссар, вай зузи дан бакIрайн ласунсса организация лякъайхту.
Ва аьрххилул жям дуллай, Аьли Шяъбановлул увкунни: «Ххал бигьавурттая жу рязину ливчIру. Заказчиктурал чулуха строительтураясса рязи бакъашиву дакъар. Ххал бигьавуртту дуллалисса чIумал аьлтту хьусса диялдакъашивуртту дукьан дантIиссар. Цамургу, подрядчикнангу, заказчикнангу агьамшиву дусса, масъала хъанай бур хIадурсса объект цила чIумал зузи баву. Цуксса хIайпнугу, ДучIивсса оьрчIал садикрал ва сооружениярттал ялун личин бунни цамургу масъала – строительство къуртал дурну дуна, му зузи дан хъунмасса хIал хъанай бушиву. Бувсса объект буруччаврил жаваб дулаву ва къаралданунсса харжлугъ бишин багьлай бур подрядчиктурал организациялун. Ва хъуннасса агьамшиву дусса масъалар. Жу му ххал бигьинтIиссар Дагъусттаннал ХIукуматрайн бувккун.
