Дагъусттаннал ЦIуллу-сагъшиву дуруччаврил министерствалул хIукмулийну, ЦIуминалийсса ЦIуссалакрал райондалул 1-мур азарханалий ковидрал къашавайми хъин буллан ккаккан бунни.

[dropcap]Ш[/dropcap]агьрулул азарханарду бувцIуну бушаврийн бувну, шикку кьамул буллантIий бур республикалул личIи-личIисса шагьрурдаясса ва районная­сса къашайшалт. ХIакьинусса кьини 100 койкалува 99 бур коронавирус дирну дянивсса ва захIматсса тагьарданийсса инсантал уттубивхьусса.
Вай бакъассагу, 15 инсан ур реанимациялул отделениялий.

Пандемия цалчин сукку хьуну диркIсса чIумал кунма, медициналул зузалт цIанагу зий бур «ятIул зоналий» хасъсса, азарунния мюхчан хьунсса янналуву.
КоронавирусрацIун дар­хIусса тагьар республикалий ххуй хъанай дакъар. Вакцинация дурминнал аьдад 15% дирсса дакъар. Коллективрал иммунитет дикIаншиврул, 60-70% инсантурал вакцинация дурну дикIан аьркинссар.

[dropcap]К[/dropcap]оллективрал иммунитет дикIаншиврул ЦIуссалакрал райондалий 18 азара инсан икIан багьлай бур вакцинация дурсса. ЦIанасса чIумал 3900 инсан ур мукунсса. Ва нюжмардий райондалийсса медициналул идарарттай биялну бакъар вакцинарду. Вакцинация дан ччими тIурча, ялу-ялун чIяву хъанай бур. Умуд бур ччясса чIумуй жучIанма вакцинарду биян банссар ва прививкартту дан ччиминнаща дан бюхъанссар тIисса.

КIицI лаган, цIанасса вирус хьхьичIмунияр цахъи личIисса дур. Вания, оьрмулул бугьараминнал дакъасса, жагьилминнал, мюрщи оьрчIалгума цIуллу-сагъшиврун нигьачIаву дур. Азарданул инсан ччяни захIматсса тагьарданийн утлай ур.

[dropcap]Ж[/dropcap]у тавакъю буллай буру жула агьалинахь, вакцинация дувара тIий. КIулну бикIан, иммунитет цалчинсса прививка дурну 42 гьантта лавгун махъ гьаз хъанай дур. Му чIумалнингу инсантуран азардания мюхчан хъанан аьркинссар. Занан аьркинссар маскардаву, дуручлан аьркин­ссар марцIшиву.