Август зурул 23-нний цIуминалийсса ЦIуссалакрал райондалийн увкIунни ДР-лул ХIукуматрал Председатель Артем Здунов.
Имара Саидова
ЦIуссалакрал райондалийнсса аьрххилул мурад бия цIуну буллалисса оьрчIал багъру ци тагьарданийн бивну бурив ххал баву. Ванащал цIуну буллалисса объектирттал ялтту буккан бувкIун бия ДР-лул Халкьуннал мажлисрал председательнал хъиривчу Елена Ельникова ва депутат Мухтар Оздеаджиев.
ДакIнин бутанну, цIуминалийсса ЦIуссалакрал райондалий ДучIиннал, Гьамиящиял ва Шушиннал шяраваллаву къуртал бавай бушиву оьрчIал багъру. Шушиял ва ДучIиннал шяраваллаву буллалисса оьрчIал багъру бур 90 оьрчI кьамул ансса кIану бусса, Гьамиящиял шяравумур оьрчIал багъ бур 140 оьрчIансса. Шанмагу оьрчIал багъ бувссар «Социально-экономическое развитие РД на 2016-2025 годы» тIисса подпроектрал лагрулий. ОьрчIал багъирдаву щаллу дурну дикIантIиссар 3 шиная 7 шинавун бияннинсса оьрмулул оьрчIансса цинярдагу шартIру. Гьарица группалуву бикIантIиссар оьрчIру шанаши бувайсса, тIуркIу бувайсса къатри, музыкалул ва спортрал заллу. Му бакъассагу, щинал масъала дузалну бикIаншиврул дирхьуну дур хъунисса резервуарду, хIаятирттаву бур гьарица группардавусса оьрчIру бялахъансса цанма-цанмасса майданну.
