[dropcap]Р[/dropcap]еспубликалул Урологиялул центрданий медсестрану зий бур ЧIяйннал шяраватусса КьурбанмахIаммадлул (Мамедлул) ва Тамарал душ Мусаева Наргиз.
— Коронавирусрал лама жула республикалийхгу къабивщуну къабивкIунни. ЧIявусса инсантал къашай хьунни, цIанасса чIумалгу бур къашавайсса. ЦIуцIаву гужну сукку хьусса чIумал, шагьрулийсса циняв азарханарду хIадур бувну бивкIссар коронавирусрал къашайшалт кьамул буллан. Мукунма хIадурну бивкIссар Урологиялул центргу. «Анаварсса кумаграл» биян буллай, кIива гьантлул дянив 100-нния ливчусса къашайшалт кьамул бувссия жу. Кув чIумал ччаннай бацIансса хIал къаличIайва. Гьантлун 12-ссятрай зий, 6 ссятрай бигьалаглай бикIайссияв, — буслай бур утти Наргиз.
[dropcap]Н[/dropcap]аргизлул бур 4 оьрчI – шанма душ ва ца арс. Шиккува кIицI лаган, Республикалул центральный азарханалий рентген-кабинетраву зий, коронавирусрал къашавайми ххал буллай бур Наргизлул ниттирссу Гульжагьра Маммараевагу.
Цийва бивхьусса бурж дакI дарцIуну, ша махъунмай къалавсун, лажин кIялану биттур бувсса цамургу чIяйридушнил цIагу ччива шиккура кIицI лаган – Салманнул душ Муртаева ТIавус. Вагу зий буссар Урологиялул центрданий медсестрану. Коронавирусрал къашайшалт букIлан бивкIукун, ва зун бивкIссар «марцIмур зоналий» – хIакинтурайн, медсестрахъайн марцIсса костюмру, маскарду ванил ва ванищал зузиминнал лаххайсса диркIссар.
Вава Центрданий зий уссар вара ЧIяйннал шяраватусса цIанихсса уролог – Сулайманнул арс АхIмад Аьбдуллаевгу. Ваная къабавсса чансса бакъа бакъахьунссар.
Цайминнал цIуллушиврул къаралданий бавцIусса зухьхьун дулуннав цIакьсса цIуллушиву!
Жул корр.