«Цифрардал ва процентирттал чIарав чIалан аьркинссар хIакьсса давугу, хIуччардугу», — увкунни ларгсса арвахIкьини национал проектру бартдигьаврин хас дурсса совещаниялий Дагъусттаннал БакIчинал къуллугърайсса Сергей Меликовлул.
Гьашину Дагъусттан гьурттуну буссар цинярда проектру бартдигьавриву, ми 12 проект хъанай дур. «Комфортная городская среда» тIисса проектрая ихтилат сукку бувайхту, Меликовлул тапшур бунни Хасавюртуллал мэр Къургъули Къургъулиевлуйн шагьрулул базардаву низам дишин. «ХIакьину щалва Ккавкказнава занай бур маша буван Хасавюртуллал базардавун, ттун баллай бур даххулт къаршину бушиву дахханашивурттайн. Ми даву дакъа личIан нигьа бувсун бухьунссар, муниятуру жува миннан къулайсса шартIругу дузал дуван ччисса, буванну уттизаманнул журалийсса ххуйсса базарду, дахху-ласу дуллалича паракьатну, налогругу дуллай.
Ялунгума марцIсса, низам дусса, лалавкьусса базардавун агьали кIункIу тIунтIиссар», — увкунни Меликовлул. Хасавюртуллал мэрнал бувсунни базарду шагьрулул зума-къирагърайн бизан бувну, ми бусса кIанттурдай агьали бигьалаглансса проектру бартдигьирча, къулайну хьунтIишиву.
Экономикалул ва территориал развитиялул министр ХIажи Султановлул бувсунни республикалул инвестицион программалул лагрулий, шанна шинал (программа шанна шинайсса дур) мутталий 333 объект буван аьркиншиву, миннувух 66 школа, 80 оьрчIансса багъ, 19 объект – медициналул учрежденияртту, 6 культуралул объект ва мукунма цаймигу.
«Мой Дагестан — моя вода» проектрая ихтилат багьайхту, Меликовлул кIицI лавгунни махинацияртту дуллалими кьянкьасса танмихIрайн кIункIу буллантIишиву, федерал бюджетравасса арцу жучIанна бигьанна най дакъашиву. Ва проектрал координатор, республикалул парламентрал депутат, Анна Безруковал бувсунни ялтту буклакисса чIумал ялун ливчушиву давриву марцI бакъасса, хIилларду дуллалисса подрядчиктал . Ххал бивгьунни совещаниялий «Мой Дагестан-Мои дороги» проект бартдигьаврил бущигу, тагьаргу.
П. Рамазанова
